Kvammaveko står for tur — korleis har du det eigentleg?
Isolasjon, usikkerheit og stengde dører. Me har alle fått kjenna på, og vorte påverka av, pandemien. Men kva har han gjort med oss?
— Dette er noko eg er kry av, og som eg snakkar om til andre: At me i Kvam markerer psykisk helse med ei heil veke, og ikkje berre éin dag, seier Ragna Helene Soldal.
Soldal, som er biblioteksjef i Kvam, snakkar om årets Kvammaveko. Ho er éin av sju i årets komité, og ser fram til endeleg å få koma i gang. Allereie sundag startar programmet, med aktivitetsdag utandørs for alle.
— Treffer alle
Kvammaveko vert arrangert årleg, i samband med verdsdagen for psykisk helse. Temaet i år er «Livet under og etter pandemien», og stiller viktige spørsmål til kvemmingane: Korleis har det eigentleg gått, dette her? Korleis har du det? Korleis har pandemien påverka oss?
— Det er eit tema som treffer alle, og som alle kan kjenna seg att i på sitt vis, seier Guro Torpe, ruskonsulent i ROP (Rus og psykisk helse) i Kvam.
Ho fortel at ho i jobben sin verkeleg har fått kjenna på pandemien og konsekvensane av han.
— Det har auka jamt med tilvisingar i avdelinga vår. Fokus på psykisk helse er viktig. Det ser me kvar dag, seier Torpe.
Einsemd og svekt tryggleik er noko mange har fått kjenna på. Trygge, faste møtestader har vore stengde, og fleire har mista både jobb og nettverk.
— Men så skal me ikkje gløyma at mange lever isolert og utan nettverk, også utan pandemi. Det er ikkje slik at dette var nytt for alle — mange har det slik heile tida, seier Torpe.
Samansveisande
Fjorårets Kvammaveko vart avlyst like før ho starta, då eit lokalt smitteutbrot sette kjeppar i hjula.
— Alt var planlagt og klart, og det var kjøpt inn mat til aktivitetsdagen. Difor stod delar av komiteen og delte ut turmat i rundkøyringane i Øystese og Norheimsund, fortel Gunn-Hilde Øymo.
Øymo har hatt sin fyrste månad i ny jobb som leiar for Grannehjelpa. Å vera heilt ny, og ha eit stort arrangement på planen med det same, ser ho på som positivt.
— Det har vore spennande og veldig moro. Komiteen er driftig. Folk tek ansvar og køyrer på. Samarbeidet fungerer, og me spelar kvarandre gode, seier Øymo.
— Og så er det veldig lett å få folk med, seier Soldal.
Positiviteten hjå kvemmingane har vore overveldande for Øymo. Det har berre vore ja å få. Soldal trur at folk ser at dette er viktig, og at arrangementet sveisar saman kommunen.
— Eg trur sponsorane våre er stolte av å kunna bidra, seier Torpe.
— Folk lengtar
Det er lenge sidan ein har kunna invitera til arrangement og fylla kvar einaste stol.
— Det er så gøy å kunna ta imot alle som vil koma, utan restriksjonar. Det er verkeleg ei god kjensle! seier Øymo.
Ho fortel at Grannehjelpa no er i full sving att etter pandemien. Ekstra kjekt er det å kunna laga til aktivitet for institusjonane og dei eldre.
— Det har vore sakna, både hjå brukarar og tilsette. Eg trur det har vore tungt å jobba i eldreomsorga, seier Øymo.
— Folk har ikkje blitt for vane med å sitja inne og vera heime?
— Heller omvendt. Folk lengtar etter å treffast!
Øymo fortel vidare om fullbooka seniormiddagar, og lange ventelister gjennom sommaren.
— Folk er sugne på å treffa folk og vera i lag med andre, seier Øymo.
Det merkar også Soldal på biblioteka. Dei har vorte samlingsplassar att, og det er ho glad for.
