Kvam og Ullensvang får 5G-tilgang
Kvam og Ullensvang er mellom dei 29 kommunane i Vestland fylke som får tilgang til 5G-nettet til Telia i andre halvår i 2022.
Det skriv verksemda i ei pressemelding om utbygginga.
Fleire enn to av tre nordmenn har no tilgang til 5G frå Telia Norge AS.
– Me skal vera fyrst i Noreg med eit landsdekkjande 5G-nett i løpet av 2023, og er svært stolte over å kunna tilby ei betre kundeoppleving på mobil og breiband til stadig fleire nordmenn, seier administrerande direktør i Telia Norge, Stein-Erik Velland i meldinga.
Telia moderniserer 4G-nettet parallelt med 5G-utbygginga, noko som inneber at farten og dekninga også i 4G-nettet vert monaleg betre, samstundes som den samla kapasiteten for 4G vert meir enn dobla.
Telenor Norge AS tilbyr kundane i Kvam og Ullensvang 5G-dekning i 2023 eller i fyrste halvdel av 2024. Det opplyser informasjonssjef i Telenor Norge, Henriette Holte, i eit straumbrev til HF.
Ifylgje henne er tiltaket mykje meir enn «berre» ei oppgradering til 5G. Telenor byter i tillegg kablar, antenner og radioutstyr . 4G-nettet får stort sett dobla kapasiteten med moderniseringa, opplyser Holte.
