Kvam mållag heidra Hardangerbadet
— Hardangerbadet er med på å styrkja den nynorske identiteten i Kvam og er eit godt førebilete for andre bedrifter.
Det skriv Kvam mållag i ei pressemelding. Laurdag 3. juli heidra mållaget Hardangerbadet AS med målprisen i Kvam for 2021 på Thon Hotel Sandven.
Mållaget oppretta prisen for å visa at kundar og publikum legg merke til kva språk bedriftene vel å bruka når dei kommuniserer. Det er den fyrste målprisen som er delt ut.
I grunngjevinga skriv mållaget at Hardangerbadet AS frå dag éin har vist at ein har eit medvite tilhøve til målbruk. Tilreisande frå Bergen og andre stader møter ein moderne, enkel nynorsk som er lett å forstå.
— Eg vart skikkeleg glad. Eg er så glad i språk og er veldig nøye, så det var kjekt å få prisen. Det er litt på sida av det me held på med, men likevel så viktig. Det er ei ære å bli lagd merke til og eit artig, lite pisk frå mållaget om at dei fylgjer med, seier Anita Storemark.
Storemark er konstituert driftsleiar i Hardangerbadet og tok imot prisen. I takketalen sa ho at god kommunikasjon er tydeleg språk. Enkelt, reint og ikkje til å misforstå. Det skapar ein open, likeverdig og direkte kommunikasjon. Ho heiar på mållaget og bevaringa av nynorsken som identiteten til kvemmingane. Storemark stilte også spørsmål om kva som er god kommunikasjon.
— Det er det som er essensen her. Me nyttar eit språk som bokmålstalande gjester lett kan forstå. Det kan ikkje vera slik at dei stoppar opp i fyrste setning, seier Storemark.
— Var de nokon gong innom tanken på å nytta bokmål?
— Eg stilte spørsmålet nokså tidleg i prosessen. Då svara Martin Vik: «Er det noko anna språk å bruka, då?». Det var ei sjølvfylgje.
Vinnaren vart heidra med eit folkemusikkprogram av Ingrid Standal Sørheim.
