Kvam i mobbetoppen i Vestland, men to skular skil seg ut

Øystese skule har framleis over snittet med elevar som seier at dei har vorte mobba.

Tidlegare i januar publiserte Utdanningsdirektoratet resultata frå den årlege elevundersøkinga. Og resultata for Kvam herad er ikkje lystig lesing når det gjeld mobbing.

Undersøkinga blir gjennomført på alle trinn frå 5. til 10. trinn, men det er berre resultat frå 7. trinn og 10. trinn som blir publiserte.

Av alle 7.-klassingar i heradet svarte 16,9 prosent at dei hadde vorte mobba av andre elevar dei siste månadane. Det tilsvarande talet i Vestland var 9,8.

I Vestland var det berre Fitjar og Vaksdal kommune som hadde høgare «mobbetal» enn Kvam i 2024.

16,9 er ein kraftig auke frå 2023. Då svarte 10,7 prosent av 7.-klassingane i Kvam at dei hadde blitt mobba av medelevar.

– For høgt

Leiar for skule i Kvam herad, Inga Lill Jensen Tolo, påpeiker at det er store variasjonar mellom skulane og trinna i Kvam. Resultata frå éi undersøking viser ikkje heile biletet, påpeikar ho.

– Men det er jo klart at talet er for høgt, og det blir følgt opp, seier Tolo.

Ho har hatt dialog med alle rektorane i heradet, og fortel at ho har fått informasjon om at undersøkinger og tiltak er sette i verk.

– Kva slags problematikk fortel skulane sjølv om?

– Det er ulikt. Nokre klassar er i gang med kartlegging for å finna ut konkret kva dette gjeld. Nokre klassar er kjende med problematikken, då det er oppretta saker i klassen, og det er allereie sett i gang tiltak. Det er òg nemnt grupperingar som skapar problem, og at elevar er usikre på kvarandre. Dei ulike skuleleiingane og lærarane undersøker nærare kva, når og korleis dette skjer. Det er ikkje éin type problematikk i dei ulike klassane på dei ulike skulane.

– Tek det på alvor

Ikkje alle resultat for enkeltskular i Kvam er publiserte. Fleire av dei er skjerma av omsyn til personvernet.

På Norheimsund skule svarte 13,2 prosent av 7.-klassingane at dei hadde blitt mobba av andre elevar.

Tala for Øystese skule er ikkje offentlege, men rektor Siri Kaale fortel at mobbetala der er høgare enn skuleleiinga skulle ynskja.

– Det tek me på alvor og jobbar for å forbetra, seier ho.

Også positive element

På Kvam ungdomsskule svarte 10,7 prosent av 10.-klassingane at dei hadde blitt mobba av andre elevar.

Konstituert rektor Elisabet Aarekol opplyser at ho kjenner til at enkelte elevar kjenner seg utrygge på skulen, og at dette blir jobba med på både individnivå og på skulen generelt.

Men sjølv om dei ikkje kan seia seg nøgde så lenge nokon blir mobba på skulen, er utviklinga frå i fjor positiv, seier Aarekol.

– I tillegg måler undersøkinga andre område enn berre mobbing, og eg vil gjerne nemna at utviklinga er positiv på mange av indikatorane.

For trass dei relativt høge mobbetala svarer elevane i Kvam stort sett at dei trivst på skulen, både på 10. trinn og 7. trinn.

På ein skala som går frå 1 til 5 har elevane som svarte, i gjennomsnitt svart 4 når dei har fått spørsmål om kor godt dei trivst på skulen. Resultatet er om lag som elles i Noreg, og litt over snittet for berre 10. trinn.

Skil seg positivt ut

To skular skil seg ut i undersøkinga i positiv forstand: Strandebarm skule og Norheimsund friskule.

På begge desse skulane var det ingen av 7.-klassingane som svarte at dei hadde blitt mobba dei siste månadane.

– Det stemmer. Undersøkinga viser at me ikkje har mobbing på skulen vår, og det er me sjølvsagt veldig nøgde med, seier Camilla Støen Bakke, rektor ved Strandebarm skule.