Kvam herad er årets ungdomskommune

– Dette er heilt sjukt! seier utekontakt i Kvam, Siriann Lillevik.

Prisen vart delt ut under Ungdomskonferansen i Mosjøen. Lillevik er til stades på konferansen saman med Sara Petrine Coucheron Fykse i Ungdomsrådet og Sondre Fagerheim Lunestad i elevrådet på Kvam ungdomsskule.

I grunngjevinga skriv juryen mellom anna at Kvam har ein tydeleg dedikasjon for sine unge, og at heradet viser stor forståing for at ingen er like.

Hylte høgt

Då Lillevik og ungdomane ringde HF halvannan time etter at prisen vart delt ut, var det mykje adrenalin og latter hjå kvemmingane. Å vinna er veldig, veldig kjekt, synest gjengen.

– Eg har vore så roleg og tenkt at «me klarar jo ikkje å slå Tromsø, liksom», fortel utekontakten.

Men det gjorde dei altså.

– Då juryen nemnde ordet «fritid», tok Siriann meg i handa, seier Fykse.

– Så sa dei Kvam, og då hylte eg, skrattar Lillevik.

Prisen vart delt ut av statsråd i Barne- og familiedepartementet, Kjersti Toppe (Sp).

– Kvam herad gjer ein strålande jobb med å ta vare på og inkludera ungdomane. Gratulera så mykje til kommunen og ungdomsrådet! seier Toppe.

Prisen er på 250.000 kroner.

I gang med planlegging

Vinnarkommunen skal utmerkja seg med eit særleg arbeid for unge sin rett til deltaking og medverknad, skriv Bufdir på heimesida. For å verta årets ungdomskommune, må engasjementet og synspunkta til dei unge vera synleg i prosessar og vedtak i kommunen.

Av om lag tjue kandidatar var Kvam nominert saman med Tromsø, Herøy og Inderøy.

– Det er heilt sjukt at me vinn mot slike svære kommunar. Det betyr jo at me klarar mykje bra, seier Lillevik.

– Det er skikkeleg kjekt at me vert sett, seier Fykse.

Kåringa fører også til at Kvam får vera vertskap for neste ungdomskonferanse.

– Eg har allereie byrja å leggja planar. Det skal me klara så fint, og det skal verta så bra! seier Lillevik.

I ein tidlegare versjon av denne saka vart det skrive at Hallvard Nordheim deltok på konferansen. Det stemmer ikkje. Feilen vart retta klokka 11.25.