Kvam E-sport byter stove

— Me har visst lenge at det er nye eigarar som skal ta over, og me fekk den endelege beskjeden om å flytta ut frå lokalet for rundt to veker sidan, opplyser Daniel Olsen, styreleiar i Kvam E-sport.

E-sportsklubben har vore stasjonert i kjellaren i Holmatun i Øystese fram til no. Arne Kristian Glück-Teigland, noverande eigar av Holmatun, skal til fjells og driva fjellstove etter nyttår, og i samband med dette vart e-sportsklubben nøydd å flytta på seg.

Lang leveringstid

Klubbstyret heiv seg rundt då den endelege beskjeden kom. Etter å ha leita og forhøyrt seg om ledige lokale, skreiv klubben til slutt ei melding på Facebook og spurde om råd. Fleire forslag og tilbod kom, og eitt av tilboda kunne ikkje ungdomane takka nei til.

— Me fekk eit godt tilbod hjå dei som eig det gamle trykkjeriet i Nedre Vik i Øystese, så no har me flytta klubben dit, opplyser Olsen.

I det nye lokalet, like ved fylkesvegen, har klubben det dei treng, i hovudsak straum og internett, fortel han.

Førebels er det ikkje store vendinga for klubben å flytta — det handlar om nokre sofaar og bord. Datamaskinene var nemleg ikkje så enkle å få tak i som klubben hadde tenkt.

— Klubben er i ein dialog med ein samarbeidspartnar i samband med innkjøp, men det syner seg at det er lang leveringstid på grafikkort, fortel styreleiaren.

— Har trua

Kvam E-sport får mange tilbakemeldingar, og Olsen møter ofte folk som spør om når klubben «opnar». Han trur klubben har eit stort potensial. Så snart maskinene er bestilte og ungdomane har leveringsdatoen klar, vert det opna for å teikna medlemskap.

Det er vanskeleg å seia noko om når maskinene vert leverte, men klubben håpar å vera i gang til nyttår, opplyser leiaren.

Kvar einaste veke jobbar styret med å koma seg eit hakk vidare. No som lokalet er i orden, vert hovudjobben igjen å skaffa meir pengar.

— Me har gjort eit stort arbeid med å skaffa sponsorar. Til no har me fått med oss tre lokale bedrifter i Kvam. Me ventar også på svar frå nokre støtteordningar, og håpar å få inn pengar der, seier Olsen.

På spleis.no er det samla inn over 13.000 kroner til klubben.