– Kva skjer her?

Spørsmålet er stilt i eit brev til Kvam herad 22. april. Ifylgje grendeutvalet skal bueiningane ha stått tomme «ei stund».

Grendeutvalet har høyrt at det er fordi bueiningane ikkje har god nok standard til å verta nytta som omsorgsbustad. No vil utvalet ha fakta på bordet. Om det stemmer, vil utvalet vita kva manglar som eventuelt er avdekte, og kva planar heradet har for å utbetra bueiningane.

– Tilstanden er så dårleg at me ikkje ynskjer å busetja nokon der, seier Stein Rykkje, leiar for forvaltning, drift og vedlikehald av bygg i Kvam herad, til HF.

– Ikkje landa på noko

I Ålvik finst totalt 23 omsorgsbustader, 6 «trygdebustader» og 1 kommunal bustad, opplyser heradet i eit svar til grendeutvalet. 5 omsorgsbustader og 5 «trygdebustader» står ledige.

1 omsorgsbustad er ikkje i bruk på grunn av fuktproblem, og 5 «trygdebustader» stettar ikkje krava til branntryggleik. Bustadene treng generelt oppgradering, skriv Rykkje.

Dei siste 10 åra har det oftast vore fleire ledige omsorgsbustader ved «Pensjonisten». Det har såleis ikkje vore trong for å oppgradera og leiga ut «trygdebustadene», opplyser han.

Ventar på gangveg

Ein annan grunn til at heradet ikkje har prioritert å leiga ut trygdebustadene er planane om ein ny gangveg mellom «Pensjonisten» og Torget.

Ifylgje Rykkje er det planlagt å etablera breiare veg bak «Pensjonisten» for å gje plass til ein ny vegtilkomst. Dette vil medføra ein del sprenging. Då kan ikkje nokon bu i bustadene, skriv Rykkje.

Gangvegen er høgt prioritert i trafikksikringsplanen for 2024–2027. Det var han òg i planen for 2020–2023. Om heradsstyret vil prioritera tiltaket, kan gangvegen tidlegast verta vedteken i budsjettet for 2025.

I traseen til gangvegen står også eit bustadhus som forfell, ifylgje Rykkje. Dette vart kjøpt for å gje god plassering til vegen. I budsjettmøtet før jul vart det utsett å riva huset til det er etablert eit prosjekt for ny gangveg.