Kva skjedde med gåvekortordninga?
Korkje ordførar, rådmann eller kommunesekretær vil svara på kvifor gåvekortordninga for studentar framleis ikkje er kunngjord.
Ullensvang kommune gjorde eit hastevedtak då Bergen kommune ville premiera studentar for å melda flytting. Ein halv million vart sette av til ordninga, og kommunestyret bad ordføraren om å laga ei ordning som skulle gjera det meir freistande å lata vera eller melda flytting tilbake. Ingenting vart gjort.
Då HF i byrjinga av april stilte spørsmål om kvar resultatet av vedtaket var, svara rådmann Ole-Jørgen Jondahl at det hadde falle mellom fleire stolar etter handsaminga.
– Ordninga vert lagd ut no, svara Jondahl 16. april.
HF spurde 23. april ordførar Roald Aga Haug (Ap) om kva han meiner Ullensvang kommune oppnår med ei gåvekortordning, no som Bergen kommune for lengst har avslutta si ordning. Han har ikkje svara på e-posten.
28. mai kontakta HF rådmannen, ordføraren og kommunesekretær Ragnvald Joakimsen for å høyra kvifor ordninga framleis ikkje var kunngjord, og om planane var endra.
Ingen har svara på e-posten. Heller ikkje ei purring 4. juni har ført til svar.
