Kva skal Botnen heita?
Botnen er fastsett som offisielt adressenamn på Botnen. Ein sjølvoppnemnd kranglefant er ikkje nøgd.
Tre innspel kom då namneforslaget Botnen vart gjort kjent for grunneigarane og Språkrådet i slutten av april. Språkrådet støtta namnet Botnen, medan Hagny og Øyvind Flatabø føreslo Smidjedalen.
Roger Botnen melde frå om at han meiner at det vil vera for lettvint å ha same adresse på heile grenda. Botnen har alltid vore eit samleomgrep på dei nedste gardane i grenda, og er også utskilde bruk frå garden med same namn. Lenger oppe i dalen finn ein stadnamn som Flatabø og Kanikkeberg, påpeika han.
I byrjinga av juni vedtok rådmannen å gje heile grenda adressenamnet Botnen. Bakgrunnen er at alle einingane har tilkome via felles veg frå kaiane, med korte sidevegar til den enkelte, skriv ho i vurderinga. Namnet Botnen vil vera eit lettfatteleg og orienterande adressenamn for både naudetatar og ålmenta elles, meiner ho.
Roger Botnen, som titulerer seg som sjølvoppnemnd kranglefant i brevet, har klaga på vedtaket. Om det må vera eitt namn for alle, burde det vera Botnagrend, meiner han. På 1980-talet, då han henta posten for besteforeldra hjå postbåten, var adressa Botnagrend.
Om Kvam herad ikkje finn grunnlag for å ta klagen til fylgje, får Statsforvaltaren siste ordet.
