– Kva sa eg?

– Det er drygt å høyra påstanden om at dette ikkje er kjent frå tidlegare.

Det skriv han i eit straumbrev til Statsforvaltaren i samband med attgroinga av fjorden som Dagens Næringsliv (DN) og HF omtala nyleg.

Moglegvis har ein ikkje kjent til mangelen på oksygen, men det har vorte sterkt åtvara mot eutrofiering mange gonger dei siste 15–20 åra, skriv Biseth.

Han har skildra verknadene av overgjødsling i form av sterke påslag av trådalgar i fleire medium, mellom anna i Bergens Tidende i 2008 og 2009. Biseth sende ei rekkje uromeldingar til Havforskingsinstituttet og dåverande Statens forureiningstilsyn (SFT).

Han hadde forskar Vivian Husa i instituttet med på synfaring i mundheimsbukta, der tilhøva var svært dårlege. Botnen såg ut som eit høgflossteppe, dekt med 30 centimeter høge brunalgar.

– Eg stussa fælt då ho erklærte at «resipienten tåler utslippene» og frikjende oppdrettsnæringa med omsyn til effekten av utsleppa, skriv Biseth.

Han har rekna ut at ein biomasse tilsvarande éin million menneske i mange tiår har fått sleppa all kloakk og overskotsfôr ureinsa i terskelfjorden. Samstundes er dei 40.000 menneska i nedslagsfeltet pålagde strenge reinsekrav.

– Ein treng ikkje vera rakettforskar for å ha spådd og skjøna at dette er ein varsla katastrofe. Det held lenge med sunt bondevit, eller kanskje me skal seia sunt fiskarvit, skriv Biseth.

Han viser til DN sine artiklar om korleis «ignorante» politikarar har late oppdrettsnæringa «herja uhindra» i Hardangerfjorden gjennom snart femti år.

Som ivrig fritidsfiskar i fjorden gjennom 40 år har han sett korleis dette har fått utvikla seg, mot åtvaringar frå fagstyresmakter og forskarar. Den varsla katastrofen er no svært nær, meiner han.

Biseth har skrive lesarinnlegg og kronikkar om problemet sidan slutten av 1990-talet. Han har kommentert og dokumentert den stadig forverra tilstanden innan luseproblematikk, rømming, smitte og ikkje minst overgjødsling.