Kuttar i salting på vintervegane

Meir vinterføre og mindre berr veg i kalde periodar vil verta konsekvensen når Statens vegvesen denne vinteren kuttar i bruken av salt på vegane.

Dermed må sjåførar som køyrer på europaveg 16 og på riks- og fylkesvegane, som vist på kartet, vera klar over at dei oftare enn før vil møta vinterveg.

– Dette er det viktig at sjåførane veit om, seier Bente Bergstø i vegvesenet i eit presseskriv.

Grunnane til innstramminga er både miljø og økonomi.

Saltet vert ikkje heilt vekke. Det skal nyttast preventivt for å hindra glatt veg som kjem av tynt snø- og isdekke eller rim. Målet er å salta «smart». Det tyder rett spreiemetode og utstyr tilpassa ulike føretilhøve.

– Me kjem òg til å bruka meir sand som erstatning for salt, der dette er mogleg, seier Bergstø.

Endringa gjeld driftskontrakt 1206 Voss.