Kutta ferjeavgangar fordi ferja var med på Norseman
På grunn av ein triatlon i Eidfjord vart det sein rutestart mellom Jondal og Tørvikbygd i laurdag.
Fjord1 AS og Vegtrafikksentralen varsla i natt om at fem ferjeavgangar med MF «Samlafjord» – hovudferja i sambandet – vert kutta laurdag morgon.
Den fyrste avgangen frå Tørvikbygd vart etter ei seinare endring fyrst klokka 07.50.
MF «Samlafjord» var i natt i Eidfjord, der ho var i bruk under starten av idrettstevlinga Norseman Xtreme Thriatlon. Det syner bilete frå arrangøren i sosiale medium. Fyrste etappe går føre seg i sjøen.
Regionleiar Tor Kristoffersen i Fjord1 stadfestar deltakinga. Han opplyser at det som fylgje av driftsutfordringar i reiarlaget var den einaste løysinga om ikkje triatlonen skulle gå i vasken.
Han forklarar i ei tekstmelding til HF at planen var at MF «Lifjord» – sommarferja i jondalssambandet – skulle ta Norseman-oppdraget, med MF «Sogn» i bakhand. Fyrstnemnde måtte inn i eit samband i Sunnhordland, og sistnemnde ligg i Bergen med ein skade i skroget. Fleire reservealternativ fanst ikkje.
– Det er berre å beklaga, skriv Kristoffersen.
Pressekontakt Vetle Nordgård Mikkelsen opplyser til HF at Skyss kjem til å undersøkja saka nærare og fylgja henne opp med Fjord1.
Torsdag kveld og heile fredag var «sommarferja» i jondalssambandet ute av drift. Klokka 10.03 laurdag melde Fjord1 at sommarferja vert innstilt laurdag på grunn av «driftsproblem». Klokka 16.22 kom meldinga om at ferja likevel ville vera i drift att klokka 17.30.
Fjord1 melde fyrst at fyrste avgang frå Tørvikbygd laurdag skulle vera klokka 08.50. Dette vart endra i ei seinare melding frå reiarlaget klokka 06.39, då ferja var ferdig med den ekstreme innsatsen i Eidfjord. Red.
