Kunst til å sitja på
Designar Hans Pulles i Ålvik har søkt om 50.000 kroner frå kraftfondet til prototypen av ein serie monumentale bybenker til det offentlege rom.
Kreasjonane skal både vera til å sitja på, vera eit møtepunkt og skapa ein identitet til staden der dei står. Benkene skal dessutan vera god reklame for firmaet til Pulles.
Prosjektet starta i januar. Kunstnaren såg snart potensialet for å skapa ein serie sitjeplassar.
Pulles ber om stønad til vidare utvikling og marknadsføring. Han vil gjera ferdig prototypen med profesjonell overflatebehandling, fint treverk til å sitja på og ei løysing for å festa stolane til grunnen.
Pulles har ein grad i produktdesign og har hjarta for objekt i det offentlege rom. Han har produsert kunst med CAD-program sidan 1997. Pulles har forma ei stor samling av bymøblar, bruer og handre på offentlege stader i Noreg og i Nederland. I ein periode pendla han mellom dei to landa. I 2000 kom Pulles til Noreg med familien, og etablerte ein verkstad i Ålvik. Der har han arbeidd sidan. Ålvikarar vil kjenna til treningsapparata han har laga ved kunstgrasbanen.
Pulles vil sjå etter ein eigna, mellombels stad i Kvam for prototypen av bybenkene. Budsjettet er på 220.000 kroner og omfattar tilverking av prototypen.
