Kunnskapshungrige pensjonistar samlast i Kabuso

Månadleg vert det samla store mengder pensjonistar, oftast i Kabuso. Her held til dømes politikarar, professorar og journalistar frå for eksempel NRK føredrag. Ofte handlar dei om samfunnet og korleis det fungerer.

7. oktober var det Bjørn Hansen som sto på scena i kunsthuset. Den tidlegare programleiaren prata om valet i USA, korleis han trudde det kan gå, konsekvensane det vil ha og den politiske historia til USA. I salen sat nitti pensjonistar som spent lytta til kva han hadde å seia.

Får friske røyster

Gjennom føredraga skapar senioruniversitetet ein sosial og kunnskapsrik ettermiddag for dei som møter opp. Godt vaksne menneske treng nemleg å utvikla seg, konstaterer Hans Edvard Rolle Olsen, som er programansvarleg i Kvam Senioruniversitet.

Han påpeikar at det kan vera viktig å få inn friske stemmer i eit miljø. Undervisingstilbodet vart starta for å opplysa og stimulera eldre. Responsen til deltakarane på opplegget er positiv, og gjestene er interesserte i kva dei på scena har å seia. Her får dei informasjonen på ein heilt annan måte enn om dei hadde sete heime framom tv-en. Ikkje berre er personen faktisk i rommet, det vert også høve til spørsmål og prat mot slutten, påpeikar Olsen.

Senioruniversitetet prøver å ha «booka» større namn og ikkje berre lokale krefter. Bjørn Hansen er såleis ikkje det einaste store namnet som har vore innom. Seinare i år kjem Martin Kolberg, tidlegare politikar i Ap, og Gunnar Danbolt, kunsthistorikar som skal snakka om jul i kunsten.

– Me har ikkje universitetet, me har ikkje teateret, men dette kan me tilby, seier Olsen, som meiner føredraga er minst like interessante som det ein kan finna til dømes i Bergen.

Det finst også eit sosialt element i samlingane. Før føredraget og i pausen er det prat og diskusjon både om dagens hovudtema og andre emne i kafeen i Kabuso. Der vert det servert Twist, kaffi og kjeks.

Ope for alle

Olsen opplyser at det ikkje er naudsynt å vera medlem i senioruniversitetet for å delta. Vel å merka får dei som har løyst kontingent, koma litt billegare inn.

Han seier òg at ein ikkje treng å sosialisera og prata. Mange av dei som kjem, har små sosiale krinsar. Dette er ein måte å vere sosial og møta folk på.

Responsen til deltakarane er ekstremt positiv. Arrangørane har fått mykje ros, fortel Olsen. Det set han stor pris på, sidan dei brukar så mykje tid på prosjektet. Oppmøtet på føredraga er veldig godt. Sjølv om den gamle «Urix»-etableraren Bjørn Hansen kanskje dreg litt ekstra, seier Olsen at nitti deltakarar ikkje er langt frå normalen.

Jon Sandven, ein av dei som lytta til føredraget måndag, seier han er med kvar gong. Det betyr mykje for han at det finst eit slikt tilbod lokalt. Dei eldre lærer mykje nytt og likar å følgja med på politikk og samfunnet, fortel han.

Han rosar arrangørane for å velja aktuelle tema som førelesarar som veit kva dei snakkar om, går grundig gjennom. Han er ein av mange som kosar seg på møta og liker å læra om verda rundt seg.