Kulturskulerektor er tilsett

Anne Cathrine Eiken (41) har fått jobben som kulturskulerektor i Kvam herad.

Ho er i dag lærar og avdelingsleiar for 1. til 4.klasse ved Norheimsund skule. I tillegg til lærarutdanning har Eiken ein mastergrad i utøvande klassisk song frå Griegakademiet i Bergen. Ho har ei svært brei erfaring som utøvande kunstnar frå inn- og utland, opplyser Kvam herad på heimesida.

I Kvam er ho kjend som medlem av programkomiteen i Hardingtonar i mange år, som dirigent i mange kor og som ansvarleg for skuleball ved Norheimsund skule. Eiken har sett opp teaterstykke for ulike aldersgrupper og har sjølv vore delaktig i mange oppsetjingar.

– Ho har svært gode kunstnariske og pedagogiske evner som kulturskulen og resten av kulturlivet i Kvam vil få glede av i dei komande åra, skriv Kvam herad.