Kulturskulen er på flyttefot

Flyttekassar, møblar, instrument og dekor — det var stor aktivitet i dei nye lokala til Kvam kulturskule i Høgenæsgården då HF var innom onsdag ettermiddag. Måndag er også elevane på plass.

— Det viktigaste no er å få ting på plass, slik at me har det me treng til undervisninga. Så vert det sikkert gjort nokre justeringar etter kvart, seier Eiken.

Lokalet i underetasjen av bygget er på 238 rutemeter. Onsdag var det framleis mykje att, men tempoet var høgt og mykje vart gjort.

— Me har fått fantastisk god hjelp, både av tilsette i kulturskulen og vaktmeistrane. Kvam herad har vore skikkeleg kjekke og greie med oss, fortel ho.

Travel haust

I samband med rivinga av gamle Norheimsund ungdomsskule gjekk Kvam herad i august ut med ynske om innspel til nye lokale for kulturskuleaktiviteten i Norheimsund. I eit heradsstyremøte i oktober vart det vedteke å plassera kulturskulen i kjellaren i Høgenæsgården i tida fram til juni 2027.

— Me ville ha det sentrumsnært, og såg på fleire alternativ. Grunnen til at me ynskte dette lokalet, er at me såg at me kunne utvikla kulturskulen. Her har me mellom anna ein teater- og dansesal som kan kombinerast med ein scene. Det var rett og slett mange spanande moglegheiter, fortel kulturskulerektoren.

I haust har mykje skjedd på kort tid. Eiken, som tok over rektorstolen 1. august, har hatt nok å hengja fingrane i. Det har vore intenst. Dei neste dagane vert ikkje mindre intense. I helga vert mellom anna hyller skrudde opp og lagerplassen organisert. Moltongardiner, ballettbarrar og speglar skal på plass, i tillegg til at det lyt ryddast og vaskast og gjerast triveleg.

— Det me er mest spente på, er lyden. Kor lydisolert kan me klara å få det? Det er litt skummelt, seier Eiken.

Gode sanseinntrykk

Elevane vil oppleva atmosfæren som god og møta dei same trygge rammene som før, meiner rektoren. Ekstra stas er det å koma inn i eit bygg der fasilitetane er oppdaterte. Lokala i den gamle ungdomsskulen var luksuriøse med tanke på den gode plassen, men fasilitetane elles var ikkje store, ifylgje Eiken.

I dei nye lokala har Lina Valland Lyngset og systera Aina Amalie Valland vore ansvarlege for fargar og dekor.

— Å vera i fine og estetisk vakre lokale betyr mykje for oss menneske. Når me har det fint rundt oss, skjer det noko med oss. Med gode sanseinntrykk i møte med proffe vaksne — både pedagogisk og kunstnarisk — trur eg elevane vil få stor glede av å vera her, seier Eiken.

Ope for fleire

Lokala i Høgenæsgården opnar for samarbeidsprosjekt i kulturskulen og med andre aktørar. Eiken ser for seg at resultatet kan verta ein kulturskule som er meir levande, slik at alle kan få sterkare band til han.

— Eg ynskjer at kulturskulen skal samarbeida på tvers med andre einingar i kommunen og med andre organisasjonar, og slik verta meir synleg i lokalsamfunnet, fortel ho.

Kulturskulen har mellom anna etablert eit samarbeid med oppveksteininga, og er med i oppvekstplanen, ifylgje Eiken. Ho har òg vore i kontakt med pleie og omsorg, og skal ha eit møte med rus og psykisk helse.

— Det vert spanande, seier Eiken.