– Kryssar fingrar og håpar på samarbeid
Parkeringsplassane på Kaien i Norheimsund fall mellom to stolar då brøytinga vart lyst ut og tildelt.
Medan Presis Vegdrift er ansvarleg for brøyting av vegen der bussen køyrer, er Kvam herad ansvarleg for parkeringsplassane langs vegstripa.
– Det vert litt av eit puslespel, seier Roger Lemme, rådgjevar for vedlikehald, drift og beredskap i avdelinga for infrastruktur og veg i Vestland fylkeskommune.
– Parkeringa inngår ikkje
På føremiddagen laurdag 23. november, etter eit snøfall natta før, vart HF merksam på at Kaien i Norheimsund ikkje var brøytt.
Kvam herad har tidlegare hatt ansvar for den fylkeskommunale brøytinga i sentrum, som underleverandør for Mesta, men det gjeld ikkje frå og med denne vinteren. Det same gjeld gang- og sykkelvegen mellom Norheimsund og Vikøy. Brøytinga har vore lyst ut på anbod, og Presis Vegdrift vart tildelt oppdraget.
Då HF kontakta Presis Vegdrift og spurde om årsaka til den manglande brøytinga, svara driftsleiar Lill Janet Steinaa fyrst at det hadde vorte brøytt i samsvar med kontrakten med Vestland fylkeskommune. Steinaa vedgjekk sidan, etter å ha sett bilete av området, at det kunne ha vore brøytt betre.
– Dette er teke opp og vil verta utbetra ved neste snøfall, forsikra ho.
Parkeringsplassane, derimot, inngår ikkje i driftskontrakten, ifylgje driftsleiaren. Etter det Steinaa har fått opplyst, er det heradet som har ansvaret for brøytinga av dei.
Presis Vegdrift skal nytta Lyse Entreprenør AS som underentreprenør. Kvam herad vart i dyraste laget, ifylgje entreprenøren.
– Får kryssa fingrane
Lemme i fylkeskommunen stadfestar at kontrakten berre omfattar vegen og ikkje parkeringsplassane.
– Parkeringsplassane er ikkje del av vegarealet, slik me ser det. Det som gjer at fylkeskommunen brøyter vegen, er at bussen går der, seier han.
– Korleis løyser ein då brøytinga i praksis?
– Det beste er å vera der samstundes, sjølvsagt, seier Lemme.
– Me får kryssa fingrane og håpa at heradet og entreprenøren får til å samarbeida, legg han til.
På eit kart Kvam herad har lagt ut på heimesida, som syner kvar kommunen er ansvarleg for brøyting i Norheimsund sentrum, er ikkje parkeringsplassane på Kaien mellom dei merkte områda.
– Som venta er det nokre område som må diskuterast med fylket, skriv konstituert teknisk sjef Nils Eivind Stranden til HF.
– Ulike krav
Heradet var i haust på synfaring med Lyse Entreprenør og Presis Vegdrift i Norheimsund sentrum. Då gjekk driftsleiar for veg i Kvam herad, Jarle Flotve, gjennom korleis heradet tidlegare har løyst brøytinga. Ingen stilte spørsmål om parkeringsplassane, opplyser han.
Tidlegare har Mesta AS hatt kontrakten med fylkeskommunen, og Kvam herad har vore underleverandør. Ifylgje Flotve har brøyting av parkeringsplassane vore del av kontrakten med Mesta.
Flotve opplyser at eit møte med fylkeskommunen er planlagt denne veka. Å ha to aktørar på «same» plassen kan verta utfordrande. Fylkeskommunen og heradet opererer med ulike krav til brøytinga, seier han. Medan fylkesvegane skal brøytast når det er kome to centimeter snø, er kravet på dei kommunale vegane ti centimeter.
– Brøytt skal det uansett bli, forsikrar driftsleiaren.
Han reknar med at partane finn ei god løysing på brøytinga, og seier at kartet på heimesida til Kvam herad vil verta oppdatert om det vert endringar.
