Kritisk til stenging av veg
Når folk skal heim frå arbeid og skule tysdag 24. mai, vert fylkesveg 79 stengd på grunn av eit sykkelritt.
Den fyrste etappen av rittet Tour of Norway går frå Bergen til Voss, via Kvam. Det inneber at fylkesvegen vert stengd i periodar mellom klokka 13.45 og 15.30. Utrykkingskøyretøy skal få passera ved behov, ifylgje arrangøren. Nyleg vart det sett opp fleire skilt sentralt i Kvam som varslar om stenginga.
Rune Nordheim har teke saka opp i eit brev til Statens vegvesen. Han er fyrst og fremst kritisk til at vegen vert stengd midt i ettermiddagsrushet på ein kvardag, når folk skal heim frå arbeid, hentar born i barnehagar og elles utføra daglege gjeremål.
I tillegg er Nordheim kritisk til skiltinga. Skilta verkar så uryddige og tilfeldige at dei ikkje kan vera godkjende etter skiltforskrifta, slik han ser det.
Pressekontakt Øystein Skotte i Statens vegvesen opplyser måndag kveld at løyvet til rittet vart gjeve måndag. HF har ikkje fått innsyn i sakshandsaminga eller svar på spørsmålet om korleis dei samfunnsmessige fylgjene av stenginga er vurderte.
Skotte viser til at fylkeskommunen har uttala seg som vegeigar. Fylkeskommunen har ingen merknader til skiltinga, og skriv at han legg til grunn at vegvesenet vurderer framkome og tryggleik.
– Fylkeskommunen er positiv til arrangementet og dei trafikale tiltaka det vert søkt om, heiter det i fråsegna.
Fredag varsla Kvam herad foreldra om at elevane ved Norheimsund skule, Øystese skule og Kvam ungdomsskule får kortare skuledag som fylgje av sykkelrittet. Dei må ta bussen klokka 12.30, ein time tidlegare enn til vanleg. Ifylgje meldinga kom varselet frå Skyss fredag, altså før vegvesenet hadde gjeve løyve.
I papiravisa tysdag 24. mai vert det diverre opplyst at meldinga frå Skyss og Kvam herad kom måndag 23. mai. Ho kom altså fredag. Red.
