Kritiserer politisk innsats, men får svar på tiltale

– Me er alvorleg bekymra over at det per i dag ikkje er sendt innspel frå den politiske administrasjonen, eller frå dei råda Kvam herad er ein del av, særleg Hardangerrådet.

Det skriv Bjarte Helland (INP) på vegner av eige parti og gruppeleiarane i MDG, R, SV, Sp og H i eit brev til ordførar Torgeir Næss (Ap) og varaordførar Frode Nygård (Frp).

Dei to sakene det vert vist til i skrivet, er det kortsiktige (sjå side 7) og det langsiktige tilbodet ved dei vidaregåande skulane i Vestland. Fyrstnemnde vert avgjord denne veka. Sistnemnde vart drøfta i dei politiske utvala i fylkeskommunen i mars og april, og eit framlegg er på høyring til 20. mai.

For Kvam vidaregåande skule inneber framlegget i den siste saka ein auke med ein halv klasse til ein heil klasse i helsearbeidarfag på VG2 ved Kvam vidaregåande skule. Vidare er det føreslege å kutta ein halv klasse og dimed fjerna tilbodet om barne- og ungdomsarbeidarfag på VG2. I den kortsiktige saka kan Kvam vidaregåande skule få fleire kutt. Mellom anna kan transport- og logistikklina falla bort.

Gruppeleiarane viser til at det er «mottatt ytringer frå fleire råd i heile Vestland som saman med lokalt næringsliv aktivt forsvarar sine skular», og oppmodar frontfigurane om å ropa høgt. Dei ynskjer informasjon om arbeidet til den politiske leiinga med skuletilbodet.

– Spar dei store orda!

Ordførar Torgeir Næss (Ap) undrar seg over at opposisjonen er uroa. Han viser i eit svar til opposisjonen til at saka om den langsiktige strukturen nyleg vart send på høyring, og at planen er å senda inn fråsegn frå Kvam etter ei drøfting i formannskapsmøtet 15. mai.

– Eg er fullt klar over at enkelte kommunar sender før høyringsutkastet er politisk vedteke og høyringa er formelt lagd ut. Eg ser ikkje noko poeng i å arbeida slik, skriv Næss.

I tillegg påpeikar han at endringane i framlegget for Kvam er små og gjev meir eller mindre ubrigda stode. Han har frå både Kvam vidaregåande skule og partifellar i fylkespolitikken fått det stadfesta, opplyser han.

– Eg meiner altså at det ikkje er grunn til å «ropa høgt» eller «forsvara skulen» i denne saka. Eg skjønar godt at somme ordførarar gjer det, når store delar av strukturane ved deira skule er truga av skulebruksplanen. Det er ikkje tilfellet for Kvam sin del. Eg meiner det er lurt å spara dei store og alvorlege orda til omstende som er alvorlegare. Då trur eg det er lettare å verta teken på alvor når det verkeleg gjeld, skriv Næss.

Når det gjeld skuletilbodet komande skuleår, arbeider både Næss og Nygård for å berga det. Dei involverer gjerne andre parti i arbeidet, skriv ordføraren, som sende yrkesopplæringsnemnda eit innspel i saka før møtet i førre veke.

I ei tilbakemelding til ordføraren skriv Helland at det fyrst og fremst er lokale innspel om transport og logistikk som er etterlyste av han og gruppeleiarane.

– Kanskje overilt

HF har vore i kontakt med to av gruppeleiarane i opposisjonen som har gjeve støtte til skrivet. Geir Madsen (SV) vedgår at han ikkje kjenner saka godt nok, og at det kritiske utspelet kanskje var litt overilt, men at han ynskte å gje støtte til Kvams einaste representant i fylkestinget.

Også Arne Sandven (H) seier at han kjenner saka om det langsiktige tilbodet litt for dårleg. Han er mest oppteken av at den politiske leiinga arbeider for å sikra tilbodet i transport og logistikk i saka om skulestrukturen komande år.

I tillegg etterlyser han informasjon frå den politiske leiinga om arbeidet. Det er ikkje relevant kva Næss og Nygård gjer som Ap- og Frp-politikarar overfor eigne parti. Dei to skal representera heile heradsstyret og bør informera om kva dei gjer i dei rollene, meiner Sandven.

Han minner om at Kvam no har ein ordførar på fulltid og ein varaordførar i 60 prosent «stilling», og forventar difor at aktiviteten vert spegla i informasjonen til dei andre partia.