Kripos-tips førte til dom

Mannen erkjende å ha lasta ned store mengder overgrepsmateriale i form av både bilete og video, men nekta for å ha delt materialet då han møtte i retten i slutten av april. Det kjem fram i ein dom frå Hordaland tingrett.

Aktor Cathrine Elisabeth Schjelderup la ned påstand om å døma mannen til to år og seks månader i fengsel, og til å betala sakskostnader. Forsvarar Thomas Nikolai Skeie Nondal la ned påstand om å vurdera mannen på mildaste måte.

Mannen er tidlegare dømd for tilsvarande lovbrot, og forklara i retten at ei hending i privatlivet var grunnen til at han på ny byrja å lasta ned overgrepsmateriale. Retten meiner at mannen har vist «eit fast forbrytersk forsett» og vist korkje vilje eller evne til å stoppa.

No er han dømd til fengsel i to år og to månader, til å gje frå seg fleire maskiner og lagringsmedium, og til å dekkja sakskostnadene.

Domen er ikkje rettskraftig.

Gav seg ikkje

Politioverbetjent Anne-Siri Tysseland ved Kvam politistasjon, som har leia etterforskinga, vitna i retten. Ho forklara at politiet starta etterforskinga på bakgrunn av tips frå Kripos, som igjen hadde fått tips frå den amerikanske organisasjonen National Center for Missing & Exploited Children.

På nyåret i 2023 vart det under ei ransaking i heimen til mannen gjort beslag av totalt 39 einingar, som til dømes datamaskiner og lagringsmedium. Då politiet utførte ransakinga, oppdaga betjentane at det i stova vart lasta ned meir materiale.

Då politiet gjekk gjennom ni av einingane, vart det funne totalt 162.000 filer. Noko av det kan vera duplisert, påpeika Tysseland. Politiet gjekk gjennom materialet over fleire månader, og mannen vart avhøyrd for siste gong før jul i fjor. 14 dagar seinare kom nok eit tips frå Kripos.

Ei ny ransaking vart gjennomført, og også denne gongen lasta mannen ned overgrepsmateriale då politiet kom til staden. Politiet tok beslag i nok ei datamaskin og ein minnepenn. Einingane inneheldt over 11.000 bilete og videoar av overgrep.

– Letta etterforskinga

Totalt er det funne 71.470 unike bilete og filmar i saka. Nokre eksempel vart viste i retten. Materialet omfattar born som etter retten si vurdering er frå under eitt år til nær tenåra. Materialet er grovt, og delar av det som vart presentert for retten, bar preg av grovt misbruk og tendensar til vald, men det er likevel ikkje av det grovaste, står det i domen.

Overgrepsmateriale vart også funne på ei fildelingsteneste, men retten fann ikkje rettsleg grunnlag for å døma mannen for å dela det.

I formildande retning la retten vekt på at mannen erkjende straffskuld i fyrste avhøyr, og at han har bidrege til å letta etterforskinga. I skjerpande retning har retten lagt vekt på at det i saka er snakk om store mengder materiale, at det er snakk om svært mange og dels svært unge born i materialet, og at mannen heldt fram med nedlasting også etter den fyrste ransakinga.