— Kring 50 kubikk med stein rasa

Det var torsdag 25. februar eit skred gjekk på den kommunale vegen ved Fyksesund. Kommunegeolog Tore Dolvik rykte raskt ut og kunne konstatera at eit bergparti hadde losna. Kring 50 kubikkmeter med steinblokker hadde landa på og sperra vegen.

Vegen vart opna att tre dagar seinare, etter at vegen var rydda og eit klatrelag hadde sett over området og reinska bort mykje stein. Dagen etter vart vegen delvis stengd att på grunn av meir arbeid med reinsking. Onsdag 3. mars sette fjellsikrarar i gang arbeidet med å sikra losneområdet, som låg mellom 50 og 70 meter over havet.

I rapporten om skredet skriv Dolvik at det i det same området er registrert eit jordskred i 2018 og nedfall av is i 2010. Dessutan har jordsig i grøfta vore ei utfordring. I tillegg reknar geologen med at det har førekome nedfall i området som ikkje er registrert som skredhending.

Eit skred kan ha mange ulike årsaker. Geologen trur vêret i tida før hendinga er medverkande, og at bergpartiet har truleg vore ustabilt og hadde nok losna før eller sidan. Han viser til at desember var mild, januar kjølig og ein del av februar mild. Vatn som har fylt sprekkar, har truleg frose til og ført til vass- og ispress. I tillegg har mykje smeltevatn ført til press i sprekkane. Kort tid før skredet fall nærare 50 millimeter regn på eitt døger.