KrF måtte leva utan eintydig svar

Spørsmålet kom frå KrF i vår. Partiet undra korleis kvemmingane ligg an med tanke på å nå det nasjonale målet om å drikka ti prosent mindre alkohol i 2025 enn i 2010.

Rådmannen svara i heradsstyremøtet 14. mars. Ho påpeika at dei lokale alkoholpolitiske retningslinene ikkje kneset det nasjonale målet om ti prosent nedgang, men rommar eit generelt mål å avgrensa forbruket for å avgrensa skadeverknadene av det.

Ikkje likskapsteikn

Rådmannen er ikkje i stand til å svara på korleis Kvam herad ligg an med tanke på målets, sidan svaret er «samansett». Salstala i statistikken rommar nemleg også sal til andre enn kvemmingar, til dømes som del av gardsturisme.

– Me kan såleis ikkje setja likskapsteikn mellom sal og konsum for kvemmingar, sa rådmannen.

I perioden 2009–2019 minka skjenkinga av alkohol i gruppe 1 i Kvam, men etter nedgangen under pandemien voks han til 2014-nivå att i 2022. I 2020 auka skjenkinga av alkohol i gruppe 2 monaleg på grunn av mange arrangement og bryllaup som var utsette til etter pandemien.

Når det gjeld butikksalet, var det stabilt i perioden 2009–2019. Etter ein auke under pandemien gjekk det ein del ned att i 2022, men ikkje heilt ned til gamalt nivå. På Vinmolopolet er trenden den same, ifylgje rådmannen.

Ho påpeika at det kommunale verkemiddelet for å påverka sal i butikk eller gardsutsal er å redusera opningstidene.

Av og til nyttig

KrF spurde i tillegg kva det har å seia i praksis at Kvam herad er ein såkalla Av-og-til-kommune, noko som har vore tilfellet sidan 2003.

Tilslutninga inneber ifylgje rådmannen at heradet får hjelp av organisasjonen Av-og-til til å informera ålmenta på ulike arenaer, og tilgang til kunnskap om rusfaglege tilhøve basert på mellom anna nasjonale spørjegranskingar der kvemmingane vert innlema.

I tillegg får Kvam vera med på nasjonale haldningskampanjar, vera del av eit nettverk med andre Av-og-til-kommunar og senda tre deltakarar gratis på ein årleg konferanse om alkohol . Av-og-til kan hjelpa til med konkrete utfordringar som promillekøyring eller ungdomsfestar, og kan gje råd om sals- og skjenkjesøknader.

Heradet har mellom anna hatt Av-og-til-stand på diverse arrangement, til dømes festivalar.