KrF fekk moralsk støtte, men det stoppa der

Dimed kan verksemda servera alkohol ikkje berre inne, men også i eit område på 40 rutemeter ved torget og haldeplassen.

Sjølv om opptil fleire uttrykte sympati med haldningane til KrF, fall i tur og orden fall KrF-framlegga om å avslå heile søknaden, å avslå søknaden om skjenkjeløyve utandørs og å starta skjenkjetida fyrst frå klokka 15. Heradsstyret avgjorde saka 1. februar.

KrF viste mellom anna til at ei sklie – i form av ei skrå steinflate – som er mykje nytta av born, ligg like ved skjenkjearealet. Difor bør ikkje heradsstyret opna for alkoholnyting der, men heller sikra ei alkoholfri sone, ifylgje partiet.

– Det er den einaste naturlege samlingsplassen i sentrum. Det er ein busshaldeplass veldig nær, og mange born og unge oppheld seg i området, sa Marta Bergesen Gravdal (KrF)

Ho meiner det finst gode argument for ein restriktiv alkoholpolitikk, til dømes at alkohol er skadeleg og at Kvam herad er ein såkalla Av-og-til-kommune. Ho ottast at løyvet kan skapa presedens i seinare saker, til dømes om det skulle dukka opp ein serveringsstad i Torghuset.

Peika på andre

Odd Valland Bovim (MDG) minte om at den nye restauranten ligg eit kort steinkast frå to andre tilbod – Naboen Pub og La Fiesta – med skjenking både inne og ute. Omsynet til lik handsaming tilseier at også den nye restauranten bør få løyve, meiner han.

Gjermund Stuve (Sp) meiner at dei folkevalde må leggja føringar i overordna planar i staden for å avvisa eitt og eitt skjenkjeløyve, slik KrF legg opp til. Elles risikerer ein ulik handsaming av sakene, meiner han.

Bovim er samd med KrF i at restauranten ligg nær «storstova» i Norheimsund. Han trur likevel ikkje at dei som vitjar ein sushirestaurant, er dei som drikk mest.

– Det er ikkje der risikoen for alkoholmisbruk aukar, sa han.

Linda Haugland Jondahl (Ap) meiner restauranten skapar utvikling og aktivitet i sentrum utanom opningstid, noko sentrum treng.

– Det er bra for Kvam og bra for Norheimsund, sa ho.

Usakleg krav

Geir Madsen (SV) tok, som i formannskapsmøtet veka før, opp estetikken i skjenkjeområdet ute. Han meiner heradet bør stilla krav om at det skal ha ei god estetisk utforming. Rådmann Anita Hesthamar opplyste at eit slikt krav vil vera såkalla usakleg og ikkje i tråd med kriteria i alkohollova, noko som fekk SV til å trekkja framlegget.

Hauger meiner trivelege fellesrom er viktig. Kvam herad er avhengig av hjelp frå næringsdrivande og frivillige for å oppnå slike, sa han. Diskusjonen om den slags høyrer likevel meir heime i dialogen om utlån av areal enn i ein skjenkjedebatt, slo han fast, og oppmoda om å visa sunn fornuft i bruken av områda.

Haytham Sarmadawy (H) trur det er betre å planleggja heile området samla sett seinare, og at det er betre for restauranten å starta med møblar som kan flyttast.

Jostein Moldsvor (KrF) påpeika at det aktuelle skjenkjeområdet ved torget er kommunalt. Han undra om heradet kan krevja ei avgift i slike tilfelle, sidan det vert nytta i kommersiell drift. Teknisk sjef Lars Ese stadfesta at det er mogeleg å krevja leige, og at det førekjem i andre tilfelle. Føringar for utlån av offentlege areal er for tida på høyring.

Sarmadawy, som sjølv driv restaurant i Øystese, påpeika at serveringsstadene i Kvam mellom anna på grunn av ymse høge avgifter ikkje har store overskot. Han meiner difor at heradet bør vera raus.