Krev tilbod i distrikta
– Når ei line fyrst er teken vekk, forsvinn kunnskapsmiljøet og lærekreftene, og det kan ta lang tid å byggja opp igjen.
Det uttalar Hardangerrådet i ei fråsegn om tilbodsstrukturen i vidaregåande opplæring i Vestland i perioden 2025–2035. Fråsegna vart vedteken i rådsmøtet på Tysnes 12. april.
Rådet meiner at perspektivet må vera lengre enn «vår- og haustsemester», og at ein treng langsiktige modellar som viser at ein vidaregåande skule i distriktet får fleire bein å stå på.
– Me bør laga eit mål for kva de og me ynskjer av utdanningstilbod i regionen vår, skriv rådet, som tek til orde for å setja av pengar til å «knusa siloar».
– Me ber om løysingar som ikkje gjer distriktsskulane «ribba» for tilbod og mangfald i tilboda. På Voss er det til dømes bygd flotte nye klasserom med utstyr til spesielle fag. Kva gjer ein med det? Kan elevar frå andre stader gå der? Dei vidaregåande skulane i distriktet har andre kvalitetar enn dei bynære å by på. Her kan det vere uante moglegheiter, heiter det i fråsegna.
Rådet oppmodar om å gå bort frå heile klassar og finna andre modellar, og protesterer mot nedlegging i distrikta og nybygg i Bergen. Oppbygd kapasitet og infrastruktur må utnyttast fyrst, ifylgje innspelet.
– Det er dei marginale studia ein vel å ta bort. Snudd på hovudet er det kanskje dei elevane som treng det mest, som mistar tilbod, skriv rådet.
