Krev sokne båtar fjerna
Ein mann har fått pålegg om å fjerna to båtar som har sokke ved ein kai i Vikane i Jondal. Mannen seier han ikkje har råd til å fjerna dei.
Pålegget kom frå Ullensvang kommune i eit brev rett før jul.
Nils Rune Kjoberg eig kaien båtane låg ved. Båteigaren brukte kaien i 2018–2019 òg. Då budde han i den eine båten, medan han skulle reparera ein seglbåt som låg på land, fortel Kjoberg.
I byrjinga av oktober kom mannen attende med båten. Kjoberg gav båteigaren beskjed om å fjerna båten fordi han var dårleg fortøydd og slo borti kaien og fjøra. 18. oktober sokk båten, seier Kjoberg.
– Brannvesenet var på staden og la ut lenser. Det var dei som varsla meg. Så vidt eg veit, har dei ikkje vore der etterpå, seier Kjoberg.
– Kom med endå ein båt
Då varsla Kjoberg båteigaren og sa frå om at han måtte fjerna båten. I staden for å fjerna han, kom han slepande med endå ein båt dagen etter. Under ekstremvêret «Jakob» sokk også denne båten, ifylgje Kjoberg.
Ifylgje Kjoberg hadde ikkje båteigaren nokon avtale med han om å plassera båtane ved kaien hans. HF har snakka med båteigaren, som stadfestar dette. Han seier at grunneigaren godtok at båtane låg der. Båteigaren hadde tenkt å reisa attende for å sjå til båtane, men kom ikkje så langt. Båtane vart skadde av det dårlege vêret. Båteigaren kan ikkje seia kva skadar dei fekk, fordi begge låg under vatn då han var der.
Kjoberg seier han har bede båteigaren om å rydda opp, men at han har sjølv enda med å rydda ting frå båtane i fjøra. Ifylgje Kjoberg hadde båteigaren ein plan om å pumpa vatn ut av den fyrste båten som sokk.
– Det var ein heilt umogleg plan å gjennomføra. Eg trur ikkje eingong han prøvde. Han innsåg vel at det ikkje gjekk, seier Kjoberg.
Båtane ligg framleis ved kaien hans. Dei er til hinder for andre båtar og ligg nesten i oppdraget til naustet hans. Båteigaren seier han ikkje veit korleis han kan rydda opp.
– Fare for ureining
I ein artikkel i Bergensavisen frå 2023 vart båteigaren sitert på at den største båten har gjort sitt, og at han nok ville enda som skrapmetall om ingen ville kjøpa båten. Båteigaren seier at båten skulle slepast til Leirvik for å bli hogga opp. Den fyrste etappen til Jondal tok 12 timar.
Rett før jul vedtok kommunen å krevja fartøya heva og destruerte innan 13. januar. Kommunen viser i brevet til eigaren til at han har ansvar for alle kostnader. Båteigaren seier at han ikkje har lese brevet. I samtalen med HF kjem det fram at han ikkje bur på adressa som brevet er sendt til.
Hastverket til kommunen er grunngjeve med at båtane ligg nær oppdrettsanlegg, kan gje fare for ureining, blokkerer for bruk av kaien og kan utgjera ein risiko for båttrafikk. Det kan i tillegg vera fare for at avfall vert spreitt med vinden, og at båtane kan verta dregne lenger ut i sjøen.
Båteigaren håpar at kommunen vil ordna opp. Han seier til HF at han ikkje har råd til å betala.
Kommunen skal ha fått varsel om saka i ein e-post 11. november. Denne er ikkje arkivert i arkivsaka. HF har bede om innsyn i han.
