Krev risikoanalyse av auka oppdrettsverksemd
Jon Øyvind Fredriksen og Britt Beege krev ein uavhengig risiko- og sårbarheitsanalyse av konsekvensen av å dobla eller tredobla den planlagde oppdrettsverksemda ikkje langt frå hyttefeltet Mulen.
Fredriksen og Beege har investert i ei hytte i Mulen. Dei har difor sendt eit innspel til arealdelen av kommuneplanen for Ullensvang
Paret forstår at politikarar er opptekne av pengar og at inntekter frå oppdrettsnæringa kan vera lettente, men dei forventar at politikarane set seg inn i berekrafta til næringa. Kva konsekvensar næringa har for kommunen som turistdestinasjon, må synleggjerast før ein tek avgjerder. Hyttefelt er ikkje så attraktive med oppdrettsanlegg tett på, meiner dei to.
Valet deira av hytte botnar i mellom anna Ullensvang-slagordet «friluftshovudstaden». Området har vore sett av til hytte- og friluftsliv sidan 1980-talet.
– Det stemmer ikkje overeins med framlegget om fleire oppdrettsanlegg rett utanfor vasskanten. Slike anlegg med døgndrift, lys, båttrafikk med meir motverkar tiltrekkingskrafta kommunen ynskjer seg, skriv Fredriksen og Beege.
Klimaavtrykket av den totale transporten av oppdrettsfisk er stort, påpeikar dei.
– For oss verkar det heile som eit søk etter kortsiktig profitt som fort kan verta eit langsiktig problem, skriv dei.
