Krev rassikring av omkøyringsvegar som eige tema

Rassikring av vegar med omkøyringsfunksjon må verta eit eige tema i regional transportplan for 2022–2033. Det meiner fungerande ordførar Frode Nygård (Frp), som saman med fungerande rådmann Heidi E. Ørjansen har sendt eit innspel i høyringa av planprogrammet.

Målet med kravet er å posisjonera Kvam betre i kampen for pengar til rassikring av Tokagjelet, forklarar Nygård.

I innspelet vert det teke til orde for at tryggleik og kapasitet på ferjekaiar må handterast i planprogrammet, og at utrasing av vegar, ikkje berre rassikring, vert drøfta. I tillegg bør programmet ha eit eige punkt om sikt og vegetasjon, heiter det.

– Mange vegstrekningar gror heilt igjen. Me fokuserer mykje på opplevinga det er så sjå fjord og fjell frå vegane våre. Dette er diverre fråverande på mange strekningar. Det gjev òg store utfordringar med trafikktryggleik og sikt, skriv Nygård og Ørjansen.

Fråsegna er ikkje politisk handsama fordi fristen var knapp, men er send på ordførarfullmakt. Dette er presisert i innspelet. Saka vert teken opp som orienteringssak i neste møtebolk, fortel Nygård.