Krev lågare fart, fleire hytter og påbod om løypeavgift og medlemskap

Det forfektar Kvamskogen Vel i ei fråsegn til kommunedelplanen for Kvamskogen. Arbeidet med revisjon av planen er i startgropa.

Kvamskogen har frå før vel to tusen hytter, men vellaget ynskjer altså fleire velkomne. For slik kan det verta mogeleg å utvida tilboda til hyttefolk til dømes med løyper, stiar, overnattingsstader, restaurantar, skitrekk, gondolbane og løypestreng. Planen bør syna kvar tiltaka kan etablerast, meiner vellaget, som tek til orde for eit nytt skitrekk frå Kleiva til Måvotsheia.

Utbyggjarar på Kvamskogen bør påleggjast å syta for naudsynte stiar, og alle nye hytteeigarar bør forplikta seg til å både betala avgift for løypekøyring og melda seg inn i Kvamskogen Vel, slik at laget kan representera alle hytteeigarane. Nye hytter bør få tilkome via bilveg, men det må vera planfrie kryssingar for skiløparane i hyttefelta, ifylgje innspelet.

Vellaget ynskjer elles mellom anna tilstrekkeleg med parkeringsplassar, gjerne i parkeringshus, gangvegar- og stiar langs hovudvegen og straumkablar i grøft. Laget argumenterer dessutan for å utvida senterområdet ved landhandelen slik at det omfattar også området ved Ungdomsheimen. Dette området kan utviklast, meiner vellaget.

Kvamskogen Vel ynskjer seg minst tre offentleg kosta toalett, utviding av løype- og stinettet, lysløype og tilrettelegging for badeplassar ved Måvotsvatnet, Vetlavatnet og Langvotnevatnet.

Kvamskogen Vel meiner fartsgrensa på heile Kvamskogen må vera 60 kilometer i timen fram til det vert bygd gang- og sykkelveg. Dessutan må arbeidet med tunnel frå Eikedalen til Steinsdalen framskundast og finansierast raskt, krev laget.