Krev betre svar om fiber

Han viste i generalforsamlinga 16. juni til at det skal vera investert 81 millionar kroner, men at forretningsområdet år etter år har hatt raude tal i driftsrekneskapen. I fjor gjekk fiberdrifta med eit underskot på litt mindre enn 0,2 millionar kroner.

Randa meiner det vil vera nyttig å få fram kva ein har bruka av ressursar på fiberutbygginga. Han har ved fleire høve tidlegare sett spørjeteikn ved fibersatsinga.

Styreleiar Gunnar Skeie slo fast at 81 millionar kroner er ei «skremmande stor investering» med tanke på at avkastinga har vore negativ.

– Det er ikkje bedriftsøkonomisk tilfredsstillande, men det er krevjande å ta stilling til om ein kan gjera noko med det. Ein kan ikkje skru fiberen av, for då har ein tapa alle pengane. Spørsmålet er om ein kan vri drifta så ein får positiv avkasting eller om det finst andre løysingar for å koma betre ut av det. 2019 var ikkje eit dårleg år, men styret meiner det er for dårleg, sa Skeie.

Han sa at det ikkje skal vera vanskeleg å levera ein samla rekneskap til det neste eigarmøtet i Kvam Energi i haust.

Jostein Ljones (Sp) minte om at det ikkje er kraftverket sjølv som har funne på fibersatsinga. Heradsstyret vedtok i si tid at ein skulle byggja ut fiber, etter tilråding frå administrasjonen.

– Me må ta det ansvaret frå vår side òg, sa han.