Krev betre grunnarbeid i kraftlinesak
Per-Gunnar Hammer meiner bruk av dagens kraftlinetrasé mellom Mauranger og Ljones bør vurderast betre.
Det går fram av fråsegna han har sendt til Noregs vassdrags- og energidirektorat. Den aktuelle saka er dei tre meldingane frå Statnett SF om oppgradering av kraftlina mellom Sauda og Øygarden frå 300 til 420 kilovolt.
Hammer meiner grundige utgreiingar av alle mogelege trasear krevst for å minimera miljøpåverknaden, kostnadene og fylgjene for samfunnet, og for å sikra at avgjerdene står seg i eit langsiktig perspektiv.
– Dei fleste alternativa som Statnett har greidd ut, har store negative konsekvensar for urørt natur og naturopplevingar, og er ikkje gunstige for dyre- og fugleliv og friluftsliv, skriv han i fråsegna.
Han oppmodar om at NVE pålegg Statnett fylgjande:
• Mastene på kvar side av Hardangerfjorden må ikkje koma i konflikt med ei eventuell bru eller med «armen» frå E134 til Bergen.
• Å greia ut ei løysing der delar av kraftlina går gjennom Jondalstunnelen.
• Å betra faktagrunnlaget i vurderinga av ny line i den gamle traseen.
• Å greia ut bruk av dagens trasé gjennom Daurmålsdalen til Demmevatnet, med ein ny trasé austover til Flatabødalen og vidare i alternativ 1.0 mot Austrepollen.
