Krev betaling etter havari
Kvam herad vil ha betalt tilbake alle kostnader knytte til naudsynte tiltak, heving og fjerning av MS «Rover».
Å halda båten med tilsyn og hindra forureining har kosta Kvam brann og redning 343.303 kroner. Å få båtvraket frakta vekk kosta 412.500 kroner.
Det kjem fram i eit krav på totalt 755.803 kroner som heradet nyleg sende til to forsikringsselskap som saman har forsikra båten. Rekninga for sjølve destruksjonen vil verta send i ettertid, står det.
Heradet meiner at forsikringsselskapa tok på seg ansvaret for kostnadane då det i ein e-post vart stadfesta at dei tok på seg hevinga av båten. Stadfestinga vart gjeven utan atterhald.
At selskapet seinare har kome fram til at forsikringstakaren ikkje har oppfylt pliktene forsikringa inneber, er noko forsikringsselskapa og forsikringstakaren må ordna opp i sjølve, skriv juridisk rådgjevar Bente Valland Bovim.
