Kremen vert Kafé hjørnet
Kremen konditori er lagt ned. Ny innehavar, nytt namn og ny meny er allereie på plass i lokala.
Nye eigarar er Solveig Helen Gjøen Mo og ektemannen Tony Mo. Ho skal vera dagleg leiar og ha ansvaret for drifta. Det nye namnet er Kafé hjørnet, og på menyen står det Mo kallar norsk tradisjonsmat.– Me satsar på å ha to middagsrettar kvar dag, varme lunsjrettar, supper, smørbrød og litt kaker. Middagsrettar vert tradisjonsrik, norsk mat som til dømes kjøtkaker, komler, lapskaus, koka laks og svinesteik, fortel Mo.
Ope alle dagar
Kafeen skal vera open alle dagar, også sundagar. Mo vurderer også å ha nattope dersom det er arrangement på til dømes Naboen pub.– Men då vert det ikkje kjøtkaker som står på menyen. Då vert det vel heller junk food av eit eller anna slag, seier ho.Mo, som flytta til Kvam frå Eikelandsosen for to år sidan, fortel at ho har jobba som både frisør og hjelpepleiar. Trass i at ho ikkje har eit kokkefagbrev, har ho fullført delar av fagbrevutdanninga. Den siste tida har ho hatt praksisplass på Thon Hotel Sandven. Praksisplassen sa ho frå seg då moglegheita til å starta eigen kafé i lokala til Kremen dukka opp.
Litt ommøblering
Kremen hadde ope fram til laurdag. Dei nye eigarane fekk nøkkelen sundag. Målet er at den nye kafeen skal servera dei første kundane fredag 6. mars.– Det vert nokre travle dagar. Me skal ommøblera, flytta ut utstyr me ikkje treng og flytta inn utstyr me treng. Sundag var 15 personar i arbeid for å flytta tungt utstyr, fortel Mo. Ho fortel at lokala skal ommøblerast for å få plass til flest mogleg. – Eg trur me i alle fall skal få plass til 28 personar inne. På dagar med godt vêr vil det vera plass til mange fleire på området utanfor, seier ho.
Vart sliten
Rogdaberg, fortel at ho bestemde seg for å leggja ned kremen like før jul. – No har eg drive konditoriet i sju år. Eg har jobba svært mykje og er sliten. Å driva eit konditori åleine tek på. I periodar har eg nesten budd i Kremen. Eg trur både familie og vener tykte at det var nok no, fortel ho. Ferie har det vorte lite av dei siste åra.– Eg har knapt hatt ein skikkeleg ferie på dei sju åra. No skal eg berre slappa av ei lita stund, før eg byrjar leita etter noko anna å gjera, seier Rogdaberg.Ho fortel at ho har baka i 34 år. Først 27 år på Hardanger bakeri, så sju år på Kremen. Ho omtalar tida i Kremen som lærerik, på godt og vondt. – Mange kjekke folk har jobba for meg i løpet av desse åra. Eg har lært mykje av dei og håpar dei har lært litt av meg. Heilt sidan eg var liten, har eg drøymt om å driva for meg sjølv. No kan eg slå meg til ro med at eg har gjort det, seier ho.
Skal framleis baka
Rogdaberg seier ho håpar ho etter kvart skal klara å skaffa seg ein jobb anten i skulen, ein barnehage eller på Toloheimen. Det vert ikkje heilt slutt på bakinga. – Eg har tenkt å ta på meg oppdrag med å baka kaker. Om det vert heime i kjellaren eller om eg skal leiga eit lokale, veit eg ikkje, seier ho.Eit lite råd har ho til Mo.– Ho kjem nok til å måtta prøva og feila og finna den rette måten å gjera det på, slik eg måtte. Ho må ikkje ta på seg for mykje. Det kan verta skummelt.
