«Kranglefant» nådde fram

Som HF skreiv nyleg, skal grenda inst i Fyksesund få såkalla adressenamn. Slikt er ypparleg grobotn for usemje.

Framlegget om adressenamnet Botnen var på høyring før sommaren. Det pådrog seg tre innspel. Det eine kom frå den sjølvutnemnde kranglefanten Roger Botnen, som etter kvart klaga på vedtaket etter at namneframlegget vart vedteke 7. juni. Han meiner det finst fleire gode argument for å nytta Botnagrend i staden for Botnen.

Rådmannen har på si side ikkje funne namnet på kart eller i stadnamnregisteret, og er heller ikkje kjend med at det er nytta i daglegtale i Kvam. Likevel meiner ho at det kan vera grunn til å ta klagen til fylgje, ut frå argumenta og frå informasjon på nettstaden lokalhistoriewiki.no som tilseier at Botnagrend har vorte vanlegare enn før.

Namneframlegget Botnagrend er difor sendt på høyring – i feriemånaden juli.