Kraftlinja redda Marie frå det fallande treet
Medan entreprenørane som skulle fjerna treet, måtte venta på ferja, tok Marie Nisamjan ansvar for å halda vegen open. Med god hjelp.
På veg heim frå Voss til Strandebarm tysdag kveld, fekk Marie Nisamjan ei uggen oppleving i det dårlege vêret.
– Eg køyrde på Tørvikbygdvegen i ruskevêret, då eg høyrde noko knatring og knitring over meg. Då eg kikka i spegelen, såg eg eit tre som hadde velta rett over bilen.
Heldigvis blei treet fanga av ei kraftlinje. Om ikkje, trur Nisamjan at treet hadde landa rett på bilen.
– Eg blei litt «shaky» kan du seia. Eg måtte berre stoppa langs vegen og setta naudblinken på, seier ho.
Tok saka i eigne hender
Det første Nisamjan gjorde, var å ringa Vegtrafikksentralen. Dei sa at dei skulle senda entreprenørar som skulle fjerna treet.
Men Nisamjan frykta at treet ville skapa farlege situasjonar.
Ho ringde derfor også politiet, men fekk til svar at dei ikkje hadde kapasitet til å komma og dirigera. Det var heller ikkje deira område, kunne dei fortelja. Dei skulle senda meldinga vidare til Vegtrafikksentralen, seier Nisamjan.
– Eg synest det var litt merkeleg. Dette var ein litt sjuk situasjon, slik eg såg det, som fort kunne bli farleg.
Dermed tok ho refleksvesten på, og byrja å dirigera trafikken sjølv.
Dei fleste bilane kom seg forbi. Etter kvart fekk ho hjelp av nokre unge menn til å saga bort greiner frå treet, slik at bussen kunne køyra under det.
– Veldig kaldt
Snart kom det også ein trailer lasta med gass, som ikkje kom seg forbi, fortel Nisamjan.
– Heldigvis tok han det med eit smil om munnen, og bidrog med godt humør og gode historier medan me dirigerte og venta, seier ho.
Strandbermingen reknar med at dei stod der på vegen i to og ein halv time, til entreprenørane frå Mesta kom. I hagl, blest og regn.
– Det var veldig kaldt, ja, bekreftar ho, og legg til:
– Me hadde ikkje særleg varme klede.
Til slutt kom entreprenørane. Dei hadde komme frå Odda, og hadde måtte venta på ferja i Jondal.
Dei fekk raskt fjerna treet, og Nisamjan kunne fortsetja heim til Strandebarm.
Ho fortel at mange av bilistane sette pris på innsatsen dei gjorde.
– Mange var fortvilte, sidan også vegen over Kvamskogen var stengd. Nokre av dei sa at vi burde fått betalt for jobben.
