– Kraftkrevjande industri har eit ansvar
Næringsorganisasjonen Sjømatbedriftene meiner det må stillast krav om minstevassføring i elvane i maurangervassdraga.
Desse er påverka av kraftanlegga i området. Kravet gjeld heile året.
Det går fram av eit høyringsnotat frå organisasjonen til vilkårsrevisjonen av maurangervassdraga som er opna av Noregs vassdrags- og energidirektorat. Føremålet med vilkårsrevisjonen er å betra miljøtilstanden i regulerte vassdrag.
Det er viktig å raskt greia ut kunnskapsgrunnlaget vidare for å leggja til rette for ei samfunnsøkonomisk kost- og nyttevurdering av den årlege minstevassføringa i Øyreselva og Austrepollelva, skriv Sjømatbedriftene.
Kunnskapen om fisken i elvane må betrast, slik at det kan avgjerast om det er grunnlag for å oppnå ein sjølvrekrutterande eller haustbar bestand av dei ulike fiskeartane som er påviste i vassdraga.
Sjømatbedriftene meiner det må etablerast eit register over kor mykje vatn dei enkelte kraftverka faktisk slepper ut. Organisasjonen meiner at den kraftkrevjande industrien har eit ansvar for kultivering og gode tilhøve for den ville lakse- og aurebestanden i elvane.
Bedriftene meiner at rognplanting og utsetjing av anadrom laksefisk i dei råka elvane må intensiverast, skriv administrerande direktør i Sjømatbedriftene, Robert Holmøy Eriksson.
