Kraftig auke i koronasmitte på Framnes

Det nye året byrja roleg og med lite smitte på den vidaregåande skulen i Vikøy. Dei siste tre vekene har det vore ein kraftig auke. Det opplyser rektor Harald Voster.

— Det har vore fullt køyr, med fleire positive snøggtestar kvar dag. Me trudde det var litt stopp førre veke, men i helga kom det 14 nye tilfelle, og utover veka har det vore jamt trykk, seier Voster.

Godt samarbeid

Kor mange av elevane som har vore sjuke, er det vanskeleg å svara på, men rektoren tippar at kring halvparten av elevane no anten er eller har vore smitta.

— Korleis løyser de situasjonen med tanke på internatet?

— Me oppfordrar elevane til å reisa heim og at foreldra hentar dei. Det har gått veldig bra, og foreldre har samarbeidd godt, seier rektoren.

Om ein ser føre seg ei bylgje, trur Voster at Framnes no er på toppen. Spørsmålet er kor lengje ein skal vera på toppen.

Han fortel at skulen har funne ein relativt god logistikk på utfordringane med mat og oppfylging.

I staben av tilsette er om lag ti prosent sjukmelde — dei fleste av dei på grunn av korona.

Ny dagsrekord

Den siste oppdateringa frå Kvam herad kom onsdag. Då vart det meldt om at 67 personar hadde fått påvist koronasmitte etter PCR-testing måndag. Det var truleg ny dagsrekord, ifylgje informasjonsrådgjevar Øyvind Strømmen.

Ikkje alle prøvesvara frå måndagen var klare. I tillegg melde heradet at 70 personar testa positivt på snøggtest frå måndag til onsdag.