Køyrde på land med båt

Ein mann har hoftesmerter etter kollisjonen på Mulen i Herand sundag. Han er mistenkt for køyring i rusa tilstand.

Hendinga vart meld om lag klokka 12. Båten som trefte land, er ein seks meter lang Daycruiser, melder Vest politidistrikt.

Båten står 10–15 meter inne på land, fortel politistasjonssjef Terje Kvalvik i Hardanger lensmannsdistrikt til HF.

Han vil ikkje seia noko om kva mannen har forklara. Saka vert etterforska. Rusmistanken er basert på ein utandingsprøve politiet tok av mannen.

Båtføraren er i 20-åra. Han hadde smerter i hofta, men var elles uskadd etter ulukka.

– Utruleg nok kom han bra frå det, seier Kvalvik, som slår fast at båten må ha hatt ein viss fart for å koma så langt opp på land utan draghjelp.

Politiet fekk meldinga om hendinga frå hyttefolk i området som høyrde ein smell. Kvalvik er ikkje kjend med at det var vitne til sjølve hendinga.