Køyrde i rus – no ventar fengsel
Ein mann frå Kvam må i fengsel og betala 120.000 kroner i bot etter ein køyretur i rusa tilstand.
Det kjem fram i ein dom frå Hordaland tingrett.
Mannen skal ifylgje domen ha køyrt bil frå Øystese til Samnanger med ein promille på mellom 1,2 og 1,3 i desember i fjor. Køyreturen resulterte i ei trafikkulukke der bilen fyrst trefte eit autovern, før han hamna på taket. Fartsgrensa er 80 kilometer i timen der ulukka hende. Ifylgje domen oppstod store materielle skadar. Sjølv kom mannen frå ulukka med mindre skadar.
Eit vitne som kom til, melde frå til naudetatane. Før etatane kom fram, hadde bilføraren stukke frå åstaden. Politiet fann føraren same natta ved hjelp av ein politihund. Då vart han opplevd som samarbeidsvillig, ifylgje politiet. Han ynskte likevel ikkje å forklara seg om køyringa eller ta blodprøve.
I retten tilstod mannen, men tilståinga fekk berre moderat innverknad på straffeutmålinga, då ho kom seint i prosessen og hadde avgrensa effekt på etterforskinga.
Bilføraren er dømd til 27 dagar i fengsel og ei bot på 120.000 kroner. I tillegg er han frådømd retten til å køyra bil i to år. Ny førarprøve må takast for å få førarkortet tilbake. Retten frifann mannen for brot på plikta til å varsla politiet, då vitnet på staden allereie hadde gjort dette. Mannen slepp å dekkja sakskostnadene.
Domen er ikkje rettskraftig.
