Køyrde i fjellveggen ved Skeianes
Naudetatane rykte ut til ei MC-ulukke ved Skeianes mellom Steinstøberget og Ytre Ålvik onsdag føremiddag. Føraren køyrde i fjellveggen.
Vest politidistrikt melde på Twitter klokka 10.44 at ein motorsykkel hadde køyrt i fjellveggen. Føraren var vaken og medviten, men skadeomfanget elles var ukjent. Ein lege var komen til staden, og naudetatane rykte ut. Ulukka vart varsla klokka 10.25.
Politibetjent Eirik Mongstad seier til HF at det kom ein møtande bil imot då ulukka hende, men at dei to køyretøya ikkje kolliderte.
Trafikken vart mellombels manuelt dirigert på staden, ifylgje politiet.
Ifylgje politioverbetjent Jarle Sjo Myklebust ved Kvam politistasjon er det oppretta sak. MC-føraren, ein mann i slutten av 50-åra, er mistenkt. Han vart frakta til sjukehuset for undersøking.
Det skal ikkje vera mistanke om promillekøyring, opplyser Myklebust.
Vegtrafikksentralen og politiet melde fyrst at ulukka hende i Fyksesundvegen ved Fykse eller Steinstø. Det er altså ikkje korrekt. Ho hende på Ålvikvegen.
