Kom truleg frå ulukke med lettare skadar
Ein bil med tre unge kvemmingar som køyrde av vegen, øydela to spikartelt og skadde ei campingvogn på Fonnaland i kveld.
Ein bil køyrde måndag kveld av vegen og hamna på nedsida av fylkesveg 49, sør for Vikøy. Politiet fekk melding om hendinga klokka 22.33.
Der trefte han to spikartelt og skadde ei campingvogn på ein campingplass. Det skal ikkje har vore nokon i vogna og spikartelta som er skadde.
Artikkelen held fram under annonsen.
Bilen køyrde mot Tørvikbygd då ulukka hende, fortel politioverbetjent Svein Valland Laupsa ved Kvam, Samnanger og Tysnes lensmannskontor. Køyretøyet har såleis kryssa vegen og kome ned i skråninga, der han følgde terrenget og til sist kvelva.
Politiet mistenkjer ikkje køyring i rusa tilstand, og er i gang med avhøyr og tekniske granskingar. Bilen har store materielle skadar og må hentast med kranbil.
Tre unge vaksne frå Kvam sat i bilen. Dei har tilsynelatande lettare skadar og får helsetilsyn. Trioen er send med ambulanse til Haukeland universitetssjukehus for å verta kontrollerte for indre skadar, fortel Laupsa, som opplyser at luftposane i bilen vart utløyste.
