– Kostnadene vert delte
Tørvikbygd Båtlag er ikkje samd i domen frå Gulating lagmannsrett, men anka ikkje. No lyt delar av båthamna fjernast og sakskostnader betalast.
Båtlaget prøvde i fleire instansar å koma i dialog for eit forlik før både tingretten og lagmannsretten, men det førte ikkje fram. Det fortel leiar i båtlaget, Olav Arne Økland.
Etter at domen kom i midten av mai, ynskte ikkje medlemene å gå vidare med saka, men heller finna løysingar innanfor rammene domen set.
Ei trist sak
I dag leiger 35 personar båtplass i hamna. Fleire førespurnader om både leige og kjøp av plass ligg på vent. Dei får truleg ikkje plass med det fyrste.
Hordaland tingrett dømde båtlaget i fjor til å fjerna delar av anlegget, slik at hamna ligg minst 35 meter frå fleire av eigedomane i Skutevik, og minst 30 meter frå andre eigedomar. Gulating lagmannsrett gjekk lenger. Frå eigedomane til Geir Øystein Djupevåg og Sverre J. Tveiten lyt det vera 35 meter til anlegget. Frå resten skal det vera 32 meter.
Lagmannsretten krev dessutan, i motsetnad til tingretten, at fortøydde båtar i hamna vert rekna som ein el av hamna når ein måler avstanden.
Totalt vart båtlaget dømt til å betala 1,4 millionar kroner i sakskostnader.
Dom er dom
Alle i båtlaget synest det heile er veldig trist, seier Økland. På vegner av båtlaget påpeikar han at utbygginga baserte seg på planar som var godkjende av styresmaktene. Reguleringsplanane var forma med heimel i statlege retningsliner, og Statsforvaltaren stadfesta det kommunale vedtaket om byggjeløyve. Statsforvaltaren kunne ikkje sjå at båtlaget ikkje hadde dei naudsynte rettane, fortel Økland. Det var grunnlaget for at båtlaget starta utbygginga av hamna.
– Domstolane har no sett til side to gjeldande reguleringsplanar i Skutevik. Det tek me til etterretning, seier lagsleiaren.
– Kostnadane er fordelte
Om den framtidige hamna opplyser Økland at båtlaget utarbeider ei ny plassering som er i samsvar med domen.
– Er det mogleg å få nokre plassar i heile teke?
– Ja, det er mogleg, seier Økland.
– Me vil prøva å få plass til dei som har hatt plass tidlegare.
Men før noko kan skje, lyt båtlaget søkja Kvam herad om å få flytta delar av hamna. Flytting er ikkje mogleg utan godkjenning. Båtlaget har bede om eit møte med Kvam herad for å drøfta tiltaket.
– Kven sit att med sakskostnadene?
– Medlemene i båtlaget må betale ein stor del. Medlemene er solidariske og kostnadene er fordelte, seier Økland.
Også motparten måtte dekkja delar av sine sakskostnader i både tingretten og lagmannsretten.
Sit att med svarteper
Prosessen er berre trist for heile bygda, synest båtlaget.
– Me har fylgt intensjonen Kvam herad har om ei båthamn i kvar bygd, og føler me sit att med svarteper. Politikarane har godkjent planar og søknader i fem omgangar, men fylgjer ikkje opp når det gjeld som mest og planar skal realiserast. Var det dette politikarane såg for seg då oreigninga vart avvist? spør laget.
– Dette var noko som skulle vera positivt for alle og utvikla bygda til å verta ein meir attraktiv plass å bu.
– Kva skjer framover?
– No må me berre sjå kva me kan få til. Me har fram til 12. oktober på å endra hamna, seier Økland.
