Kos og kremmarar
På parkeringsplassen ved Felleskjøpet var det julemarknad med salsbuer med lokal mat, hesteriding og juletresal laurdag.
Marknaden i Øystese var eit samarbeid mellom Bondens Marked og Felleskjøpet.
Utandørs var det fleire buer med representantar for lokale gardsbruk. Dei selde mange forskjellige produkt som dei har laga sjølve. Lenger borte på plassen var det ponniar som dei yngste kunne ri på.
Julemarknaden heldt fram inne hjå Felleskjøpet, der det var tilbod om andletsmåling. Folk varma seg på bålpannene, kjøpte juletre eller rei på ponniar.
Tidlegare har Bondens Marked arrangert liknande ein gong i månaden i Norheimsund. No har marknaden slege seg saman med Felleskjøpet for å få til ein julemarknad med ekstra høgtidsstemning.
Ei av dei som selde produkt frå garden, er Anne Lise Boye. Ho fortel at det var samarbeid med Felleskjøpet om ein vårmarknad tidlegare i år, og no altså om julemarknaden. Sjølv hadde ho si eiga bu der ho selde blant anna flatbrød.
Boye seier at ho er glad for alle som kjem på marknadene, og ho oppmodar alle om å handla lokalt. Det er nemleg litt av målet, seier ho.
– Me må prøva å få det til å skje noko i bygdene, seier seljaren.
Dagleg leiar Jarand Havrevoll ved Felleskjøpet-butikken seier at noko av poenget er å skapa aktivitet i bygda. Han har undervegs hatt god kontakt med produsentane i Bondens Marked i samarbeidet om bruk av uteområdet, sal av juletre og mogelegheiter for ponniriding. Også inne i butikken hans var det pynta til jul. Fleire av dei i kassen hadde på seg julegenser og nissehue.
Marknaden trekte jamt med folk, fortel Havrevoll.
