Kontaktlaus ferjebetaling på høyring
Dersom ordninga med kontaktlaus betaling på ferjene skal bli permanent, er det nødvendig med lovendringar. No sender vegvesenet forslaget på høyring.
– Gjennom koronapandemien har det vore mogleg å nytte skiltgjenkjenning eller Autopass-brikke for å kunne krevje inn betaling for ferjereiser i staden for manuell betaling. Dette har vore populært, og mange ønsker at det skal bli ei alternativ ordning på permanent basis. Da må vi endre lova, og forslaga til endringar er no sendt på høyring, seier samferdselsminister Jon-Ivar Nygård i ei pressemelding.
Frå april 2020 fram til 1. juli 2022 har ei mellombels lov gjort det mogleg å betale for ferjebillettane utan å vere i kontakt med mannskapet. Å redusere spreiing av covid-19-viruset har vore årsaka.
– For å kunne innføre dette som ei permanent ordning, må vi få på plass gode og sikre løysingar for handsaminga av personopplysningar. Det er hovudformålet med forslaget til lovendringar, seier Nygård.
Høyringa vert avslutta 7. april, og etter handsaming vil Statens vegvesen sende eit forslag om lovendring til Samferdselsdepartementet.
(©NPK)
