Konkurrerer i legoteknologi
Programmerarlaget «Coder’s Fist» frå Norheimsund Friskule deltek laurdag i verdas største teknologi- og kunnskapskonkurranse, First Lego League.
Det opplyser Ingvild Fylling i ei pressemelding på vegner av Equinor Morgendagens helter. Konkurransen går ut på å designa, byggja, programmera og køyra legorobotar.
Kring 607 lag deltek i dei regionale finalane i 27 norske byar. Den regionale finalen, som samlar 24 lag med born og unge frå bergensområdet, vert avvikla i VilVite-senteret i Bergen. Deltakarane kjempar om prisar i ulike kategoriar, heider, ære og ein plass i den skandinaviske finalen. Konkurransen har som mål å inspirera deltakarane, som er i alderen 10 til 16 år, til å verta morgondagens ingeniørar, forskarar og problemløysarar.
Temaet for årets konkurranse er «Masterpiece». Her skal laga forska på korleis dei kan bruka teknologi til å betra formidlinga av kunst og kultur for å engasjera andre og oppmuntra fleire til å delta i det dei likar gjera. Deltakarane må finna fram si kreative side.
