Kondisjon og tradisjon
Sundag stod Tørvikbygdløpet 2022 for tur. Løpet vart arrangert for 38. gong, og med nær dobbelt så mange deltakarar som året før.
Det var godt oppmøte og det vart ein kjekk dag, ifylgje leiar Svein Straumstein i Tørvikbygd Idrettslag. Ekstra moro var det at tradisjonen med komler etter løpet vart teken opp att dette året, tykkjer han. Komlene var det Berge Gard og Gartneri som stod bak.
108 personar deltok i løpet, mot kring 60 året før.
I år som i fjor var det Andrea Sørheim Almeland som stod øvst på pallen i klassen for jenter mellom 13 og 17 år. På 2.-plass kom Astrid Sandven, og Amanda Nernes sprang inn til ein 3.-plass. I herreklassen var det fjorårets mann på 2.-plass, Øystein Brurok, som sprang inn til siger. Bak han kom Andreas Kjelby og Markus Straumstein på 2.- og 3.-plass.
Klassen for kvinner vann Lillian Ege Berentsen. Bak henne kom i tur og orden Solgunn Eide Kvamme og Hildegun Tveit.
