– Kommunen har ytt hard innsats

Det forsikra ordførar Roald Aga Haug (Ap) i formannskapsmøtet onsdag. Bakteppet var eit spørsmål frå Lajla-Margrethe Lindskog-Lund (Sp). Ho uttrykte på vegner av tiltakshavar Henning Grønhaug i Hardanger Fishfarm AS frustrasjon over treg framdrift i saka.

Haug viste til at kommunen hadde meklingsmøte med Statsforvaltaren i oktober i fjor, etter at sistnemnde fremja motsegn til fleire punkt i reguleringsplanen for Plommevika. Før sommaren opplyste han at motsegna framleis står ved lag.

– Me nådde fram med alt bortsett frå deponiet under sjøoverflata, sa Haug til formannskapet.

Sjølv meiner han det må kunna lata seg løysa å få på plass deponiet, sjølv om det er omfattande og går langt ut i sjøen.

– Me har reist til månen og laga gass og olje i Nordsjøen på imponerande vis. Det må få an å laga ei steinfylling på sjøbotnen, sa han.

Det er risikoen for utrasing som fyrst og fremst valdar Statsforvaltaren otte. Etter ordføraren sitt syn må ansvaret for tryggleiken kvila på utbyggjaren.

Ifylgje han har kommunen signalisert at kommunen vil vedta reguleringsplanen med motsegn, slik at saka kjem til avgjerd i departementet. Kommunen har òg sagt at han trur at han vil få gjennomslag, sa Haug.

Kommunen bad i juli om eit nytt meklingsmøte. 17. august sende kommunen ei ny oppmoding og varsla at han ville senda tilleggsinformasjon i saka tidleg i september.

– Kommunen har ytt ein solid innsats i saka med tanke på å få henne i den retninga Grønhaug ynskjer, sa Haug.