Kom ingen veg med klage
Klagen frå naboar på endringar av eit byggjeløyve vart avvist av Statsforvaltaren i Vestland.
Næraste naboar til Kulturnaustet, Kirsten og Arild McClellan Steine, klaga på endringar i eit rammeløyve til Hardanger fartøyvernsenter som vart gjeve av Kvam herad i haust. Endringane i søknaden gjorde dei uroa over ulemper vindauga i bygget ville gje. Rådmannen avviste klagen dei sende.
Medan saka låg til avgjerd hjå Statsforvaltaren, slutta naboane i dei andre seksjonane i bygget seg til og laga eit støtteskriv. Dessutan sende Steine ytterlegare ein e-post der paret hevda at byggjeløyvet vart gjeve basert på feil informasjon. Dei bad Statsforvaltaren om å senda klagesaka i retur for ny handsaming.
Slik vart det ikkje. Statsforvaltaren stadfesta nyleg vedtaket til Kvam herad. Ho viser til at tiltaket i endringssøknaden er i tråd med føringane for området og innanfor rammene av tidlegare byggjeløyve, og har ikkje noko å utsetja på måten heradet har vurderte ulempene med innsyn på.
Statsforvaltaren meiner at ingenting tilseier at naboeigedomen vert påført større eller andre ulemper med innsyn etter endringa av løyvet.
I den siste e-posten frå Steine står det at informasjon som kom fram i ettertid, slår beina under eit av argumenta som låg til grunn for avslaget. Argumentet dreiar seg om gjenbruk av bygget som stod på tomta. Ekteparet viser mellom anna til at det i eit møte mellom utbyggjar og naboar vart stadfesta at gjenbruk ikkje lenger var aktuelt.
Ifylgje Statsforvaltaren er det ikkje kome nye opplysingar som tilseier avgjerande feil i sakshandsaminga.
