Kom frå fjern og nær

Det var meir liv enn vanleg i gangane på Framnes laurdag. Årsaka var at fleire enn hundre 10.-klassingar hadde komme til Vikøy for å ta skulen i augesyn.

Gjestene vart delte inn i grupper og tekne med til fagstasjonar rundt om på skulen. På stasjonane fekk gjestene oppleva alt frå kjemiske og fysiske eksperiment til leik med fotballar.

Etter fagstasjonane var det spel og kviss i peisestova og fysiske aktivitetar i fotballhallen. For mange vart truleg høgdepunktet talentiaden som gjekk av stabelen i Framnes Arena om kvelden. Der kunne både noverande og elevar og gjester prøva seg på scenen.

– Stort kristent miljø

Bendik Christiansen var truleg den som hadde reist lengst. Han kjem frå Øksnes i Vesterålen i Nordland.

– Eg har reist heilt til Framnes fordi eg tykkjer dette er ein veldig bra skule, og eg har tenkt å byrja her til hausten, fortel han.

– Kva gjer Framnes så spanande?

– Det meste av slekta mi har gått på Framnes. Dei har snakka fint om skulen.

– Kva har dei her som dei ikkje har i Vesterålen?

– Eit stort kristent miljø. I Øksnes er det berre eit lite kristent miljø.

– Internat er bra

Søskenbarna Simon Dalen og Andrea Dalen hadde reist frå Levanger. Også dei har høyrt mykje fint om skulen frå slektningar.

– Foreldra mine har jobba på skulen. Eg har også ei søster som er elev her. Dei har fortalt mykje om skulen. Dessutan tykkjer eg det er stilig å bu på internat. Framnes har gode idrettsfag. Eg har lyst til å gå på toppfotball, fortel Simon.

Han har ikkje bestemt seg.

– Det står mellom Framnes og ein skule i Levanger.

Andrea tykkjer også livet på ein internatskule freistar.

– Internatskule er bra for dei som ønskjer å koma seg vekk frå heimstaden. Her trur eg det er eit veldig godt kristent miljø som tek godt imot deg. Det finst andre kristne internatskular, men eg trur ikkje miljøet er like bra der, seier ho.

– Stor interesse

Lærar Jens Ivar Breivold Melås er leiar i komiteen som står bak open dag. Han fortel at skulen har invitert til open dag eller open helg årleg i årevis.

– Me vil at dei som vurderer skulen, skal kunna sjå fasilitetane og møta lærarar og elevar, fortel han.

Skulen lenge hadde eit tak på 100 gjester, men dei siste åra har interessa vorte så stor at taket er heva til 130. Dårleg vêr gjorde at mange melde forfall. Det endelege talet på frammøtte vart 108.

Sjølv om dei fleste gjestene kom frå Vestland, var det også gjester frå Møre og Romsdal, Rogaland, Viken og altså Trøndelag og Nordland.

– Det er stas at folk reiser så langt for å sjå kva Framnes har å tilby. Noko av det beste med ein internatskule er at me samlar folk frå heile landet. Det er alltid kjekt å høyra ulike dialektar i gangane eller matsalen, seier Melås.

Om lag femten 10.-klassingar frå Kvam vitja skulen på den opne dagen.