Kolliderte ved Røyrvik
Ein bil med to personar kolliderte med fjellveggen ved Røyrvik tysdag kveld. Den eine vart send til sjukehus.
Ulukka nyårsaftan på fylkesveg 576 vart meld til politiet klokka 18.51.
Berre éin bil var involvert i hendinga. Bilen skal ha treft fjellveggen og så hamna i vegen att. To personar sat i han, og båe var medvitne etter ulukka.
Det opplyste Vest politidistrikt i Politiloggen klokka 18.59.
Naudetatane rykte ut. Føraren vart send til legevakta for ein sjekk, medan passasjeren vart send til Haukeland universitetssjukehus, fortel politioverbetjent Jarle Sjo Myklebust ved Kvam politistasjon til HF.
Bilen, som var flytta til sida på vegen for å opna for trafikk då HF kom til staden, fekk ikkje store skadar. Fjellveggen trefte bilen i døra på passasjersida. Bilbergar vart tinga, og klokka 20.42 var bilen fjerna.
Myklebust opplyser at bilen var på på veg frå Tørvikbygd mot Strandebarm då føraren mista kontrollen i ein sving. Føret var glatt. Politiet mistenkjer korkje høg fart eller ruskøyring, men det vert oppretta sak som fylgje av personskade, fortel han.
