– Kø i hovudet av gode minne

Prisen, ein nesten ti kilo stor stein frå Glynt ovanfor Breidablik, vart delt ut i heradsstyremøtet 3. november. Han vert delt mellom Bergen og Hordaland Turlag og dei to tidlegare eigarane av Breidablik.

– Utruleg gjævt for oss. Me er like opprømte og stolte alle saman, sa BHT-leiar Helene Ødven i takketalen.

Ho mimra tilbake til 2012, då Bjarne Huse ringde henne og spurde om det kunne vera aktuelt for turlaget å vidareføra hyttedrifta. Allereie året etter vart anlegget opna, og i 2016 vart det etablert ei prosjektgruppe som arbeidde med utvikling av staden. Resultatet vart ei ny, stor hytte som erstatta den gamle hovudhytta. Ho vart opna i fjor.

Tok seg god tid

Arkitekt er Eilif Bjørge, som har utført arbeidet på dugnad, til liks med mange andre involverte. Også Bjørge var til stades tysdag. Han delte æra med hytteutvalet i BHT og med det lokale hyttetilsynet, ikkje minst Ingmar Ølmheim og Arne Nøttveit.

Bjørge fortalde at ein tok seg god tid for å finna det rette utbyggingsalternativet. Fleire vart vurderte og forkasta. Ein la vekt på å følgja tradisjonen innan materialval og bruk av stein. Kortsida vart lagd mot «pøyso» for å skåna utsikt, og vona var at den plogliknande utforminga av bygget vil sikra at snøen ville leggja seg på nordsida av nybygget, slik at vinterinngangen er meir eller mindre tilgjengeleg i den kalde årstida.

Til heimesida til BHT seier Bjørge at han har stor respekt for det Huse-paret gjorde, og legg vekt på at dei nye bygga måtte «snakka saman» med den eldre bygningsmassen.

– Eg trur me fekk det til, sa han.

Bjarne Huse trekte fram to minne av dei mange som lagar «kø i hovudet». Det eine var då dei tidlegare eigarane gav Kvam herad hovudbry ved å søkja om få tiltaka godkjende. Mot to røyster vart det akseptert.

– Det er eg glad for, sa Huse.

Det andre var då Olav Skeie Lid i fjor sommar, saman med Kvammakoret, framførte to vers han har skrive om Breidablik.

– Audmjukt og sjelfullt

Juryen viser til at utbygginga har føregått i to etappar. Bjarne og Anne Marit Huse har teke omsyn til landskapet på ein sjelfull og poetisk måte, og den enkle og vakre framgangsmåten er teken vidare på ein sensitiv og audmjuk måte i den siste etappen, heiter det. Den siste utbygginga held høg kvalitet og spelar på lag med den opphavlege arkitekturen.

– Bjørge har makta å forvalta historia og kvaliteten, som er nøysamt teken vare på og nytta aktivt som referansepunkt i eksteriør og interiør. Materialbruken er ærleg, med stein, tre og vegetasjon i dei fleste overflater. Prosjektet viser ei djup forståing for landskapet, skriv juryen.

I juryen sat Heidi E. Ørjansen, Jon Nedkvitne, Bjørn Vik og Niklas S. Alveberg i Kvam herad.

Kven som får den tunge jobben med å bera premiesteinen med plakett på opp att til Breidablik, sa ingen noko om.